Uppþot í Kaupmannahöfn

Sautján voru handteknir í Kaupmannahöfn í nótt og hefur lögregla farið fram á gæsluvarðhald yfir fimm þeirra. Mikill órói var á götum höfuðborgarinnar og í fleiri borgum Danmerkur í nótt og hefur verið kveikt í bílum og gámum á nokkrum stöðum.

Fjögur ungmenni voru staðin að verki við að kveikja í tveimur bílum og á öðrum stað í borginni var maður handtekinn með bensínssprengju innan klæða. Þá þurfti lögregla að beita táragasi á hóp ungmenna og ráðist var á ljósmyndara Jyllands Posten sem var við störf á Norðurbrú.

Talið er að uppþotin tengist óánægju fólks með endurbirtingu skopmynda af Múhameð spámanni.