Skera rúma fjóra milljarða af vega­gerð

Að sögn Guðmundar Vals Guðmundssonar, framkvæmdastjóra þróunarsviðs Vegagerðarinnar, var í fjármálaáætlun og samgönguáætlun gert ráð fyrir 34,8 milljörðum króna til nýframkvæmda og viðhalds á árinu 2027. Núna sé í fjárlagafrumvarpinu gert ráð fyrir 32,4 milljörðum króna á næsta ári, um 2,4 milljörðum króna minna.

Guðmundur treystir sé ekki til að nefna hvaða verkefni gætu verið skorin niður. Það eigi eftir að skoða. Hann kveðst þó vonast til að þessi niðurskurður verði ekki niðurstaðan.

„Framlag ríkisins til Betri samgangna er lækkað um tvo milljarða tímabundið árið 2027, samkvæmt frumvarpinu,“ segir Þorsteinn R. Hermannsson, framkvæmdastjóri Betri samgangna.

„Það gæti tafið upphaf hluta þeirra framkvæmda sem áætlað var að hefja á næsta ári. Við erum að skoða vandlega hvaða áhrif þetta hefur og munum uppfæra áætlanir okkar næstu vikur,“ segir Þorsteinn. 

Hann segir stærstu framkvæmdir, sem áætlað var að hefja á árinu 2027, vera Sæbrautarstokk og fleiri leggi í fyrstu lotu Borgarlínu.

Stærstu framkvæmdir hjá Vegagerðinni árið 2027, samkvæmt samgönguáætlun, og eftir er að bjóða út og semja um, eru breikkun Vesturlandsvegar á Kjalarnesi, lokaáfangi í Gufudalssveit, Bíldudalsvegur, brúarsmíði yfir Skjálfandafljót, færsla hringvegarins í Reyðarfjarðarbotni, byrjunarframkvæmdir á Axarvegi og breikkun Suðurlandsvegar í útjaðri í Reykjavíkur, milli Gunnarshólma og Hólmsár.

Eyjólfur Ármannsson innviðaráðherra segir hærri fjárhæðir ætlaðar til vegakerfisins og vetrarþjónustu í samgönguáætlun núverandi ríkisstjórnar en í tillögu fyrri ríkisstjórnar. Núverandi ríkisstjórn stefnir jafnframt að því að hefja framkvæmdir við Fljótagöng árið 2027 og undirbúa fleiri jarðgöng. Viðtal við Eyjólf má lesa hér.

Fréttin var uppfærð með viðbrögðum innviðaráðherra og tilvísun í viðtal við ráðherra.