Japanskir þingmenn vilja afnema dauðarefsingu

Hópur þingmanna á Japanska þinginu hefur unnið frumvarp sem miðar að því að banna dauðarefsingar í landinu næstu fjögur árin.Frumvarpið er sagt vera skref í þá átt að banna dauðarefsingar með öllu í landinu.

Í stað dauðarefsingar stinga þingmennirnir upp á því að menn verði dæmdir í fangelsi til lífstíðar án þess að eiga möguleika á náðun. Japan er, ásamt Bandaríkjunum, eina iðnvædda lýðræðisríkið í heiminum þar sem dauðarefsingar tíðkast enn. Japönsk stjórnvöld hafa lengi verið harðlega gagnrýnd af mannréttindasamtökum fyrir háttinn sem þau hafa á dauðarefsingum. Algengt er að aftakan fari fram með leynd og með stuttum fyrirvara til þess að koma í veg fyrir að hægt sé að áfrýja dómunum.

Fangarnir eru hengdir, yfirleitt á föstudögum og á meðan þingið er í fríi, til þess að minnka líkurnar á fjölmiðlaumfjöllun og mótmælum almennings. Frumvarpið er lagt fram af þingmönnum úr öllum flokkum en litlar líkur eru á því að það nái fram að ganga þar sem dómsmálaráðherrann núverandi er mikill stuðningsmaður dauðarefsingar og hefur hann undirritað sex dauðadóma frá því hann settist á ráðherrastól í september í fyrra.