Kvikmynd um einkalíf Putin

Ný kvikmynd um einkalíf Vladimir Putin Rússlandsforseta verður brátt gefin út á DVD í Rússlandi. Myndin nefnist A Kiss - Off the record og er væntanlegur útgáfudagur Valentínusardagurinn, 14. febrúar. Hún segir frá þýskumælandi Rússa frá Pétursborg sem vinnur leynilega vinnu. Hann giftist flugfreyju, eignast tvær dætur og verður að lokum forseti.

Sagan er eins og saga Putins þrátt fyrir að nafn hans sé aldrei nefnt í myndinni.

Lokið var við gerð myndarinnar fyrir fimm árum síðan, en getgátur hafa verið uppi um að Kremlin hafi seinkað útkomu hennar þar til nú, nokkrum vikum áður en forsetinn lætur af embætti.

Afar lítið er vitað um einkalíf Putins. Kona hans Ludmila kemur sjaldan fram opinberlega og fáar myndir eru til af uppkomnum dætrum þeirra, Maríu og Katerinu.

„Myndin er um konu sem á mjög upptekinn mann, konu sem vill eignast fjölskyldu og börn og vill hafa ástmann sinn nálægt," sagði Oleg Fomin listrænn leikstjóri myndarinnar.

Samkvæmt heimildum BBC eru sum lykilatriði myndarinnar nánast bein tilvísun í einkalíf forsetans. Þar má nefna fyrsta fund hans með Ludmillu eiginkonu hans, brúðkaup þeirra árið 1983 og flutningur til Dresden í Þýskalandi þar sem Putin vann fyrir rússnesku leyniþjónustuna KGB.