Ríkisstjóri New York segir af sér

Eliot Spitzer ríkisstjóri New York sagði af sér nú rétt í þessu. Á blaðamannafundi sem sjónvarpað var beint á CNN baðst hann innilega afsökunar á því að hafa ekki staðist væntingar.

Með konu sína sér við hlið sagðist hann iðrast mjög, en bætti jafnframt við að sem opinber starfsmaður hefði hann náð miklum árangri. Hann gæti þó ekki leyft persónulegum mistökum að skemma fyrir opinberum störfum sínum. Gríðarlegur fjöldi fjölmiðlafólks var við bygginguna og þyrla sveimaði yfir.

Spitzer hefur sætt mikilli gagnrýni eftir að upp komst að hann tengdist vændishring sem nú sætir lögreglurannsókn.

Nokkrir þingmenn í New York hafa krafist afsagnar Spitzer en hann hefur þráast við og setið fundi með lögmönnum sínum síðan kaup hans á þjónustu vændiskonu urðu opinber í upphafi vikunnar. Lögmennirnir hafa meðal annars kannað hvernig ríkisstjórinn geti komist hjá opinberri ákæru ef hann lætur af embætti.

Eins og kunnugt er af fréttum var Spitzer gripinn með lúxusvændiskonu á hóteli í Washington í síðasta mánuði og var handtaka hans liður í rannsókn bandarísku alríkislögreglunnar FBI á alþjóðlegum vændishring sem seldi þjónustu sína til hinna þekktu og ríku. Spitzer var ekki nafngreindur í rannsókn FBI en heimildarmaður CNN-fréttastofunnar segir hann hafa verið nefndan „Viðskiptavin-9". Hann hefur ekki verið ákærður.

Bandaríska blaðið New York Times hefur heimildir fyrir því að Spitzer hafi notfært sér þjónustu vændiskvenna að staðaldri síðustu tíu árin eða svo fyrir allt að fimm milljónum króna.

Málið er sérlega neyðarleg fyrir Spitzer því hann komst til metorða sem ríkissaksóknari fyrir baráttu sína gegn hvítflibbaglæpum og gekk undir nafninu Fógetinn af Wall Street. Hann vann einnig í nokkrum málum gegn vændishringjum. Þegar hann var kjörinn ríkisstjóri árið 2006 var eitt helsta baráttumál hans að berjast gegn vændi í New York.

Hann var talinn eiga bjarta framtíð í stjórnmálum vestanhafs og þótti meðal annars álitlegt forsetaefni demókrata í framtíðinni. Samkvæmt fregnum nýtur Spitzer lítils stuðnings eða samúðar innan flokksins nú.

Spitzer baðst afsökunar á mánudag en sagði ekki á hverju og hefur ekki svarað spurningum um málið.