Reiknað er með afsögn ríkisstjórans í New York í dag

Reiknað er með að ríkisstjórinn í New York muni segja af sér í dag. Forystumaður Repúblikana á ríkisþinginu hefur gefið ríkisstjóranum 48 stunda frest til að segja af sér annars muni þingið svipta hann embættinu.

Ríkisstjórinn og demókratinn Eliot Spitzer hefur hingað til þráast við að segja af sér. Hann hefur verið á stöðugum fundum með lögmönnum sínum síðan að kaup hans á þjónustu vændiskonu urðu opinber í upphafi vikunnar. Þeir hafa meðal annars kannað hvernig ríkisstjórinn kemst hjá opinberri ákæru ef hann lætur af embætti.

Eins og kunnugt er af fréttum var Spitzer gripinn með lúxusvændiskonu á hóteli í Washington í síðasta mánuði og var handtaka hans liður í rannsókn bandarísku alríkislögreglunnar FBI á alþjóðlegum vændishring sem seldi þjónustu sína til hinna þekktu og ríku.

Bandaríska blaðið New York Times hefur heimildir fyrir því að Spitzer hafi notfært sér þjónustu vændiskvenna að staðaldri síðustu tíu árin eða svo. Hafi hann keypt þjónustu þeirra fyrir sem nemur yfir 5 milljónum króna.

Er hann var kjörinn ríkisstjóri árið 2006 var eitt helsta baráttumál hans að berjast gegn vændi í New York. Samkvæmt fregnum nýtur Spitzer einskis stuðnings ná samúðar innan eigin flokks.