Allt logar í Danmörku

Í gærkvöldi og nótt loguðu eldar í fleiri dönskum bæjum en áður, meðal annars í Kaupmannahöfn, Árósum og Óðinsvéum. Reið ungmenni kveiktu í ruslagámum, bílum og skólum. Ástæðurnar eru sagðar vera endurbirtingar Múhameðsteikningar, langvarandi reiði innflytjendahópa og brottvísanir tveggja Túnisa sem eru grunaðir um skipulagningu morðs á teiknara Jótlandspóstsins.

Birthe Rønn Hornbeck, innflytjendaráðherra, er sögð vera óhæf í málinu, þar sem hún hefur opinberlega sagt að hún hafi aldrei verið hrifin af lagabókstafnum að baki brottvísunum án réttarhalds.

„Mikið hefur verið rætt um það hér í Danmörku undanfarna daga hvort þessi útlendingalöggjöf standist í raun mannréttindi - það er að segja, má vísa fólki úr landi án þess að segja því af hverju? Biskupinn í Árósum telur svo ekki vera."

„Eftir 2001 var allur heimurinn haldin ofsahræðslu, og Danmörk að sjálfsögðu líka. Þá voru samþykkt hryðjuverkalög sem ætti að vera búið að endurskoða. Menn ættu að viðurkenna að þetta var gert í óðagoti," segir Kjeld Holm biskup í Árósum.

„Það er þvert gegn minni réttlætiskennd. Þetta er algjörlega óskiljanlegt. Eins og teiknarinn sjálfur segir, þá er hann dauðhræddur um að hann hitti einn þeirra grunuðu sem nú gengur laus," segir Kjeld Holm þegar hann er spurður um álit sitt á því að sá sem kveikir í ruslagámi sé leiddur fyrir dómara en ekki sá sem er grunaður um morð á teiknara?