Bandaríkjamenn ætla að endurskoða fjárhagsaðstoð við Pakistan

Bandaríkjamenn munu endurskoða alla fjárhagsaðstoð við Pakistana, vegna ákvörðunar Musharrafs forseta um að lýsa yfir neyðarlögum í landinu. Þetta segir Condolezza Rice, utanríkisráðherra Bandaríkjanna. Pakistanir hafa hingað til verið ein helsta bandaþjóð þeirra í baráttunni gegn hryðjuverkum.

„Augljóslega hafa aðstæður breyst og við verðum að endurskoða stöðuna," sagði Rice og benti á að málið væri flókið vegna þess að stór hluti af þeim fjármunum sem Pakistanir fengu frá Bandaríkjunum færu í gagnhryðjuverkastarfsemi.

Rice sagði að stjórnvöld í Bandaríkjunum hefðu ekki fengið að vita um fyrirætlanir Musharrafs áður en hann hrifsaði til sín völdin í gær. „Ákvörðun hans veldur mér vonbrigðum," sagði Rice.

Shaukat Aziz, forsætisráðherra í Pakistan, segir að neyðarlög muni gilda eins lengi og þurfa þykir og hugsanlega muni kosningar í landinu frestast vegna þeirra. Fyrirhugað var að þær færu fram í janúar næstkomandi.