Tveir sænskir piltar handteknir fyrir að hóta rektor menntaskóla

Tveir sænskir piltar, 16 og 17 ára, hafa verið handteknir eftir að þeir hótuðu rektor skólans sem þeir sækja, Enskede Gårds menntaskólanum.

Haft er eftir skólastjóranum á sænska fréttavefnum Dagens Nyheter að drengirnir hafi verið undir áhrifum atburðanna í Jokela-menntaskólanum í Finnlandi í fyrradag þar sem menntaskólapiltur gekk berserksgang og myrti átta með skammbyssu. Skólastjórinn vildi hins vegar ekki gefa upp í hverju hótunin hefði falist nákvæmlega en sagði piltana hafa haft mikinn áhuga á vopnum og sömuleiðis atburðunum í Columbine-skólanum í Bandaríkjunum þar sem fjöldi manns var myrtur árið 1999.

Skólastjórinn segist hafa haft samband við lögregluna í gær og handtók hún piltana tvo í morgun vegna gruns um að þeir hafi hvatt til morðs, eins og lögregla orðar það.