Davíð Þór: Á von á tilboði frá Norrköping

Davíð Þór Viðarsson, leikmaður FH, er kominn aftur til Íslands eftir að hafa dvalið hjá sænska 1. deildarliðinu Norrköping í nokkra daga.

„Það gekk mjög vel," sagði Davíð sem var hjá liðinu í fjóra daga. „Þeir voru aðallega að ræða við mig og sýna mér aðstöðu félagsins. Þjálfari liðsins hefur séð mig spila 3-4 sinnum og hefur þegar gert það upp við sig að hann vilji fá mig. Ég reikna því með tilboði frá félaginu og það mun þá koma í ljós hvort að FH og Norrköping nái saman annars vegar og svo hins vegar ég og félagið."

Hann segir að ef það gengur eðlilega fyrir sig býst hann við því að semja við félagið. „Mér finnst það ekkert ólíklegt. Þetta er stór og flottur klúbbur og spennandi tímar framundan."

Norrköping er þegar búið að tryggja sér meistaratitilinn í sænsku 1. deildinni og sæti í úrvalsdeildinni á næsta tímabili.

„Þeir ætla sér að styrkja liðið með nokkrum leikmönnum til að verða samkeppnishæfir í þessari deild. Og þeir virðast vilja fá mig til að nota mig og skiptir það auðvitað máli."

Garðar Gunnlaugsson og Stefán Þórðarson eru á mála hjá Norrköping en sá síðarnefndi er reyndar á leiðinni heim. „Það er fínt að aðrir Íslendingar spili með liðinu. Það hjálpar mjög mikið."

Davíð Þór, sem er 24 ára gamall, lék með norska úrvalsdeildarliðinu Lilleström árin 2002 til 2004. Þá spreytti hann sig einnig hjá Lokeren í Belgíu í nokkra mánuði í fyrra.

„Ég tala norsku reiprennandi og sænskan verður ekkert vandamál. Það gæti einnig hjálpað mér mikið. En það er alveg ljóst að ég er ekki að fara út bara til að fara út. Í Noregi sat ég á bekknum í tvö ár með fáeinum undantekningum og hef ég engan áhuga á því. Þetta er mjög gaman þegar vel gengur en hrikalega leiðinlegt þegar illa gengur."