Rússar vara Tékka við að samþykkja eldflaugavarnarkerfi

Rússar vöruðu tékknesk stjórnvöld við því í morgun að heimila Bandaríkjamönnum að setja upp hluta af eldflaugavarnarkerfi sínu í landinu. Haft er eftir yfirmanni rússneska herráðsins að með því væru Tékkar að gera mikil mistök.

Bandaríkjamenn og Tékkar hafa átt í viðræðum um uppsetningu ratsjárkerfis í Tékklandi sem tengjast á eldflaugavarnarkerfi Bandaríkjamanna. Flaugarnar sjálfar eiga að vera staðsettar í Póllandi. Rússar eru andvígir þessum áformum og hafa meðal annars hótað því að beina kjarnorkueldflaugum sínum aftur á borgir í Evrópu.

Í morgun fundaði Yuri Baluyevsky, yfirmaður rússneska herráðsins, með Martin Bartak, aðstoðarvarnarmálaráðherra Tékklands. Eftir fundinn sagði Yuri að ef Tékkar yrðu við óskum Bandaríkjamanna væru þeir að gera mikil mistök.