Myndband með þýskum gísl sýnt í Afganistan

Afganskar sjónvarpsstöðvar hafa í dag sýnt myndband þar sem sjá má þýska hjálparstarfsmanninn sem mannræningjar rændu í gær í Kabúl. Konan er klædd í slæðu og í myndbandinu kynnir hún sig sem Christina Meier. Hún segist vera heil á húfi.

Maður kemur síðan í mynd og lýsir því yfir að Meier verði ekki gert mein verði stjórnvöld við kröfu mannræningjanna en þeir krefjast þess að föngum sem hann segir saklausa, verði sleppt. Hann segir að nöfn fanganna verði send sjónvarpsstöðvunum seinna í dag.

„Við erum ekki Talíbanar, við erum ekki vondar manneskjur," segir maðurinn síðan. Persónuskilríki Meier sjást einnig í myndbandinu. Meier er fyrsti útlendingurinn sem lendir í höndum mannræningja í Kabúl í tvö ár. Meier vinnur fyrir kristileg hjálparsamtök, Ora International og henni var rænt úti á götu í gær. Lögreglumenn urðu vitni að ráninu, þeir skutu á bíl mannræningjanna en hittu ekki og drápu leigubílstjóra í staðinn.