Ballack: Ég er ekki á leiðinni til Madrid

Miðjumaðurinn Michael Ballack hefur sagt að hann sé ánægður hjá Chelsea og að það sé ekkert til í þeim sögum að hann sé á leiðinni til Real Madrid. Ballack gekk til liðs við Chelsea síðasta sumar en fjölmiðlar á Spáni segja Real Madrid ætla að kaupa bæði Ballack og Arjen Robben frá Chelsea.

Á heimasíðu Chelsea segir Ballack að hann ætli sér að vera áfram hjá liðinu. „Ég kom hingað til að vinna titla og til að standa mig vel í enska boltanum. Ég vil að aðdáendur félagsins viti það. Ég og fjölskyldan mín erum mjög ánægð í London. Orðrómurinn um að ég sé á förum er ekki réttur," segir Ballack. „Ég hef engan áhuga á að yfirgefa Chelsea og þar af leiðandi hef ég ekkert talað við Real Madrid. Ég er svekktur yfir því að vera meiddur núna en ég vinn að því að jafna mig svo ég geti byrjað að spila aftur."

Samt sem áður hefur umboðsmaður kappans, Michael Becker, sagt þýskum fjölmiðlum að hann sé í viðræðum við Real Madrid. En Becker sagði forráðamönnum Spánarmeistarana að þeir þurfi að ræða við Chelsa vilji þeir halda viðræðunum áfram.