Vilja stöðva morð á stúlkubörnum

Indversk stjórnvöld hafa ákveðið að skrá allar þunganir þar í landi til að koma í veg fyrir að foreldrar myrði stúlkubörn. Hjá fátækum fjölskyldum þykir ekki eftirsóknarvert að eignast stúlku þar sem þær þykja byrði á fjölskyldunni og ekki eins góðar fyrirvinnur og strákar. Talið er að allt 10 milljónir stúlkubarna hafi verið myrt á Indlandi á síðastliðnum áratug.

Á Indlandi eru nú í gildi sérstök lög sem banna kyngreiningu fóstra en foreldrar nota greininguna til að eyða kvenkynsfóstrum. Þetta hefur þó ekki náð að draga úr fóstureyðingum sem gerðar eru einungis vegna kyn fóstursins. Þá er einnig fjölmörg tilfelli þar sem nýfædd stúlkubörn eru drepin með því að brjóta á þeim hálsinn eða þau kæfð með einhverjum hætti.

Helmingur fæðinga á Indlandi fer fram í heimahúsum og fæstar þunganir eru tilkynntar yfirvöldum sérstaklega. Með skráningu þungana vonast stjórnvöld því til þess að hægt verði að koma í veg fyrir þessi morð.