Spánverjar senda herskip til að klófesta fjársjóð

Spánverjar hafa sent herskip til að stöðva tvo bandaríska báta sem grunur leikur á að hafi innanborðs fjársjóð sem tekinn var úr gömlu spænsku skipsflaki. Telja spænsk yfirvöld að fjársjóðurinn tilheyri þeim í samræmi við alþjóðalög en hingað til hafa Bandaríkjamennirnir ekki viljað viðurkenna þá kröfu.

Bátarnir tveir eru nú á bresku yfirráðarsvæði við Gíbraltar og bíða spænsku herskipin eftir því að þeir leggi úr höfn. Bátarnir eru í eigu bandaríska fyrirtækisins Odyssey Marine Exploration en fulltrúar þess tilkynntu í síðasta mánuði að þeir hefðu fundið hálfa milljón silfurpeninga í gömlu spænsku skipsflaki á botni Atlantshafsins.

Hingað til hefur fyrirtækið hins vegar ekki viljað gefa upp hvar flakið er að finna. Um er ræða stærsta fjársjóð sem fundist hefur á seinni tímum.

Spænsk stjórnvöld telja að fjársjóðinn tilheyra spænska ríkinu og hafa meðal annars vísað í alþjóðalög máli sínu til stuðnings. „Við erum í fullum rétti og í samræmi við alþjóðalög," sagði Carmen Calvo, menningarmálaráðherra Spánar, í samtali við spænska fjölmiðla í dag. „Það sem einu sinni tilheyrði Spáni mun tilheyra Spáni á ný."