Kasparov sektaður um 2500 krónur fyrir ólæti

Garrí Kasparov, fyrrverandi heimsmeistara í skák, var sleppt úr haldi lögreglunnar í Moskvu í dag eftir að hafa verið sektaður um þúsund rúblur, jafnvirði um 2500 króna, fyrir að trufla almannafrið með því að taka þátt í mótmælum stjórnarandstæðinga í Rússlandi.

Fregnir bárust að því í morgun að hann hefði verið handtekinn og sleppt skömmu síðar en það reyndist ekki rétt því hann var í haldi lögreglunnar í um tíu klukkustundir. Hann var svo dreginn fyrir dómara vegna þátttöku sinnar í mótmælunum þar sem hann fékk fyrrgreinda sekt.

Í samtali við fjölmiðla fyrir utan dómshúsið í Moskvu sagði Kasparov að upphæðin skipti ekki máli heldur fordæmið. Ef hann yrði handtekinn aftur þá yrði hann settur á bak við lás og slá.

Kasparov var í hópi 170 andstæðinga Pútíns Rússlandsforseta sem handteknir voru fyrir að taka þátt í ólöglegum mótmælum í Moskvu en þeir saka yfirvöld í Kreml um einræðistilburði. Boðað hefur verið til mótmæla gegn rússneskum yfirvöldum á morgun í Pétursborg en yfirvöld segja að þau séu einnig óheimil.