Keane á enn í deilum við Íra

Roy Keane, stjóri Sunderland og fyrrum fyrirliði írska landsliðsins, er ekki hættur að deila á írska knattspyrnusambandið þó hann sé búinn að leggja skóna á hilluna. Keane átti í frægum deilum við landsliðsþjálfarann þegar hann spilaði með liðinu á sínum tíma og nú hefur hann gagnrýnt hreppapólitík hjá knattspyrnusambandinu í heimalandi sínu.

Keane vill meina að leikmenn utan af landi njóti ekki náð fyrir augum forráðamanna landsliðsins á sama hátt og leikmenn frá höfuðborgarsvæðinu. Hann einnig að landsliðið í dag standi höllum fæti.

"Það hjálpar Liam Miller sannarlega ekki að vera frá Cork," sagði Keane, sem sjálfur er þaðan. "Ég er viss um að hann væri í landsliðinu ef hann væri frá Dublin. Ég er ekki bara að tuða, þetta er svona og hefur verið svona síðan ég lék með landsliðinu. Þegar ég lék með unglingaliðinu á sínum tíma voru strákar í liðinu sem voru yngri og óreyndari - en komust í liðið af því þeir voru frá Dublin.

Ég veit að Steve Staunton landsliðsþjálfari er ekki frá Dublin, en stjórn knattspyrnusambandsins er þaðan. Strákar frá Cork þurfa að leika miklu betur en félagar þeirra frá Dublin til að fá sæti í landsliðinu," sagði Keane og skaut í leiðinni föstum skotum að írska liðinu í dag - þar sem hann telur að sumir leikmenn haldi sæti sínu af gömlum vana.

"Það er fín lína á milli þess að vera tryggur og vera heimskur. Það er allt í lagi að leyfa rótgrónum landsliðsmönnum að spila svo lengi sem þeir standa sig, en ef þeir fá að vera þarna af gömlum vana, er það orðið vandamál.

Það eru engir írskir landsliðsmenn að grípa fyrirsagnir í knattspyrnuheiminum í augnablikinu og ég held að írska knattspyrnusambandið geti lært ýmislegt af rugby-liðinu. Ef þú hefur ekki trú á verkefninu - muntu ekki ná neinum árangri," sagði Keane.