Pútín styður Medvedev til forsetaframboðs

Vladímír Pútín, forseti Rússlands, lýsti í dag yfir stuðningi við Dmítrí Medvedev varaforsætisráðherra sem næsta forseta landsins.

„Ég hef þekkt hann vel í yfir 17 ár og ég styð fullkomlega tillögu um framboð hans," hefur Itar-Tass fréttastofan eftir Pútín sem hitti forvígismenn flokks síns, Sameinaðs Rússland, í dag.

Fram hefur komið að forsetaframbjóðandi Sameinaðs Rússlands verði valinn á flokksþingi í næstu viku en fastlega er búist við að sá sem verði fyrir valinu verði næsti forseti Rússlands enda hefur flokkurinn yfirburðastöðu í rússneskum stjórnmálum.

Seinna kjörtímabili Pútíns í forsetaembætti lýkur á næsta ári en gengið verður til forsetakosninga í Rússlandi í mars.