Meintur hryðjuverkamaður gefur sig fram

Fjórði maðurinn sem grunaður er um aðild að áformum um sprengjuárásir á John F. Kennedy alþjóðaflugvöllinnn í New York gaf sig fram við lögregluyfirvöld á eyjunni í Trínidad og Tobago í dag. Maðurinn, sem heitir Abdel Nur, segist vera hafður fyrir rangri sök og að um samsæri gegn honum sé að ræða.

Bandarísk yfirvöld gáfu út ákærur á sunnudaginn á hendur mönnum fjórum sem taldir eru standa á bak áform um sprengjuárásir á John F. Kennedy alþjóðaflugvöllinn í New York. Mennirnir eru sagðir hafa ætlað að sprengja öflugar sprengjur á flugvellinum, meðal annars sprengja eldsneytisgeyma og leiðslur fyrir þotueldsneyti.

Yfirvöld í Bandaríkjunum voru þegar búin að handtaka þrjá menn í tengslum við áformin. Abdel Nur gaf sig fram við lögregluyfirvöld í bænum Diego Martin á vesturströnd Trínidad og Tobago skömmu eftir hádegi að staðartíma. Í viðtali við blaðamann sagðist hann vera hafður fyrir rangri sök. „Ég er saklaus og þetta er allt saman samsæri gegn mér," sagði Abdel Nur.

Hinir þrír sem hafa verið handteknir vegna málsins eru Russel Defreitas, Abdul Kadir og Kareem Ibrahim. Í yfirlýsingu sem dóttir Ibrahim sendi frá sér segir hún föður sinn og Kadir vera fórnarlömb samsæris sem Repúblikanaflokkurinn í Bandaríkjunum standi á bak við. Tilgangurinn sé að ýta undir hræðslu Bandaríkjamanna við hryðjuverkaárásir og þannig hjálpa flokknum í komandi forsetakosningum þar í landi.