Fagnað við komuna til Bretlands

Fimmtán breskum sjóliðum, sem verið höfðu í haldi Írana í nærri tvær vikur, var fagnað við komuna til Bretlands í dag. Sjóliðarnir flugu frá Tehran snemma í morgun. Aðeins degi eftir að forseti Írans, tilkynnti að þeim yrði sleppt og sagði ákvörðunina gjöf til Breta.

Sjóliðarnir voru handteknir fyrir meint landhelgisbrot fyrir þrettán dögum og vildu stjórnvöld í Íran að Bretar viðurkenndu að hafa farið inn í íranska lögsögu. Þeir neituðu því.

Þegar flugvél sjóliðanna hófst á loft frá Tehran í morgun fögnuðu þeir ákaft og skáluðu í kampavíni. Flugvélin lenti á Heathrowflugvelli í Lundúnum fyrir hádegi að íslenskum tíma.

Tony Blair, forsætisráðherra Bretlands, lýsti yfir ánægju með farsæla lausn deilunnar en minntist um leið fjögurra breska hermanna sem létu lífið í árás í Basra í Írak í morgun. Blair lagði áherslu á að ekki mætti slaka á gagnvart Írönum og nefndi sérstaklega stuðning ýmissa ráðamanna í Íran við hryðjuverkamenn í Írak.

Blair sagði engan samning hafi verið við írönsk stjórnvöld til að fá sjóliðana lausa. Deilan hafi þó opnað fyrir samskipti á milli þjóðanna sem skynsamlegt væri að nýta.

Mahmoud Ahmadinejad tók við sem forseti Írans árið 2005 og óhætt er að segja að hann hafi reynst vestrænum þjóðum erfiðari í samskiptum en fyrrirrennari hans Muhammad Khatami. Hörð afstaða Ahmadinejad varðandi kjarnorkuáætlun Írana hefur aflað honum óvinsælda á erlendri grundu og hefur hann ekki hikað við að gefa út herskáar yfirlýsingar sem hafa áunnið honum fyrirlitningu meðal vestrænna þjóða.

Ekki eru allir sammála um af hverju Ahmadinejad sleppti gíslunum en stjórnmálaskýrendur telja margir að hann hafi verið búinn að fullnýta áróðursgildi atburðarins og ekki viljað hætta á átök. Olíuverð fór hækkandi á meðan á deilunni stóð sem sýndi glöggt hve óttinn við átök er mikill.

Flogið var með sjóliðana frá Lundúnum á herstöð nærri Devon í suðvesturhluta Bretlands. Þar var þeim ákaft fagnað af ættingjum sínum.