Brown segist geta lært af mistökum Blairs

Gordon Brown sagði í dag að hann myndi læra af mistökum sem voru gerð af Blair stjórninni í aðdraganda innrásarinnar í Írak. Brown er staddur í Írak um þessar mundir. Hann sagði að gæta yrði þess að mati á gögnum leyniþjónustunnar væri haldið utan við pólitískt argaþras. Þetta kemur fram á vefútgáfu Financial Times.

Brown fullyrti að í framtíðinni yrðu leyniþjónustugögn metin af aðilum sem væru óháðir stjórnvöldum. Hingað til hefur sami aðili tekið að sér mat á leyniþjónustugögnum og verið í daglegum ráðgjafastörfum fyrir forsætisráðherrann. Brown sagði að þessu myndi hann breyta.

Íraskir stjórnmálamenn spurðu Brown þrálátt að því hvenær hann hyggðist draga úr herliði Breta í Írak. Þeirri spurningu vildi hann ekki svara. Bretar hafa nú þegar dregið verulega úr heraflanum, úr 7,500 niður í 5,500. Á síðastliðnum vikum hafa stjórnvöld í Bretlandi reynt að fullvissa Bandaríkjamenn um að þeir muni standa við skuldbindingar sínar og muni ekki draga úr herliði fyrr en ástandið í Írak batnar.