Beck birtir breiðsíðu ásakana

Eftir að hafa baðað sig í kastljósi heimsfjölmiðlanna sem gestgjafi leiðtogafundar G-8-hóps mestu iðnríkja heims þarf Angela Merkel, kanslari Þýskalands, nú að hafa sig alla við til að tryggja friðinn á stjórnarheimilinu í Berlín.

Brestunum virðist nú fjölga stöðugt í „hagkvæmnishjónabandi“ Kristilega demókrataflokksins, sem Merkel fer fyrir, og jafnaðarmanna sem komst á eftir kosningarnar haustið 2005. Kurt Beck, formaður Jafnaðarmannaflokksins, birti í gær mikla breiðsíðu pólitískra ásakana í garð ríkisstjórnarsamstarfsflokksins á heilli síðu í hinu annars íhaldssama dagblaði Frankfurter Allgemeine Zeitung.

Í greininni sakar Beck kristilega demókrata um „nýfrjálshyggju“ eða of mikla áherslu á markaðslausnir á kostnað félagslegs jöfnuðar. „Það er furðulegt hve lítil stjórnmálareynsla endurspeglast í draumnum um „báknið burt“,“ skrifar hann. „Ef kristilegir demókratar tækju sjálfa sig á orðinu yrði útkoman minni menntun, minni fjárfestingar og minna réttaröryggi.“

Beck, sem fer fyrir stjórn sambandslandsins Rheinland-Pfalz, á ekki sæti í sambandsríkisstjórninni og hefur þannig fríara spil til gagnrýni en annars væri.

Volker Kauder, þingflokksformaður kristilegra demókrata í Sambandsþinginu, lét sér gagnrýni Becks þó í léttu rúmi liggja og sagði flokkinn staðráðinn í að halda stjórnarsamstarfinu áfram til loka kjörtímabilsins árið 2009.