Vieri fer ekki til Hull City

Sá orðrómur er aftur kominn á kreik að Ítalinn Christian Vieri sé á leið til enska 1. deildarfélagsins Hull City.

„Ég veit ekki hvaðan þetta er komið. Þetta mál átti sér stað við upphaf tímabilsins en síðan þá hef ég ekkert heyrt af því,“ sagði Phil Brown, stjóri Hull City.

Samningur Vieri við Atalanta rann út í vor og stóð honum þá til boða að fara til Hull City. Hann valdi hins vegar að fara til Fiorentina sem situr nú í þriðja sæti ítölsku úrvalsdeildarinnar, á eftir Inter og Juventus.

Hjá Fiorentina hefur hann hins vegar fallið í skuggann á Adrian Mutu sem hefur skorað fjögur mörk í deildinni til þessa. Vieri hefur skorað eitt en enn ekki fengið sæti í byrjunarliðinu.