Gagnrýnir bresku lögregluna

Ronald Noble, yfirmaður alþjóðalögreglunnar Interpol, gagnrýnir harðlega aðgerðir bresku lögreglunnar gegn hryðjuverkamönnum. Hann segir bresku lögregluna hvorki nýta sér sem skyldi upplýsingar frá Interpol, né heldur hafi breska lögreglan viljað veita Interpol upplýsingar um menn sem hafi verið handteknir í Bretlandi grunaðir um hryðjuverk.

Noble segir reyndar að einungis 17 af 186 aðildarríkjum Interpol fylgist reglubundið með því hvort vegabréfanúmer ferðamanna, sem koma til þessara landa, sé að finna á lista Interpol yfir stolin eða týnd ferðaskilríki. Meira en 15 milljón skjöl eru skráð á þennan lista, og þar á meðal eru meira en sjö milljónir vegabréfa.

„Á hinn bóginn er í öllum löndum leitað kerfisbundið í töskum okkar til að kanna hvort við erum með flöskur með vatni eða öðrum vökva. Þessi forgangsröðun sýnist vera misráðin.“

Noble segir að í Sviss sé flett upp í þessum gagnagrunni um það bil 300 þúsund sinnum í hverjum mánuði, og venjulega finnist þá um hundrað týnd eða stolin vegabréf. Bretar fletta hins vegar aðeins 30 sinnum í mánuði upp í þessum gagnagrunni, og í Bandaríkjunum sé aðeins 80 sinnum á mánuði flett upp í honum.

Noble sér ekki minnstu ástæðu til að tengja hryðjuverkahættu sérstaklega við innflytjendur. Mesta hættan stafi einfaldlega af því að ekki sé kannað hvort vegabréf, sem fólk notar á ferðum sínum milli landa, séu stolin eða týnd.