Upplausn í Mógadisjú

Mógadisjú, höfuðborg Sómalíu, er stjórnlaus eftir að íslamskir uppreisnarmenn sem ráðið hafa borginni flýðu undan hersveitum ríkisstjórnarinnar í morgun. Hópur sem tengist al-Kaída skorar nú á fylgismenn sína að halda til Sómalíu og aðstoða trúbræður sína í stríðinu sem þar geisar. Borgarbúar fagna nú stjórnarhermönnum sem eru að koma til borgarinnar.

Liðsmenn íslamska dómsstólaráðsins svonefnda hafa undanfarna daga hörfað undan stórsókn sómalska stjórnarhersins, sem nýtur öflugs stuðnings eþíópíska hersins. Í gær flýðu þeir borgina Jowhar og nú virðist baráttan um höfuðborgina Mógadisjú einnig töpuð. Sharif Ahmed, einn leiðtoga íslamistanna, sagði í samtali við al-Jazeera sjónvarpsstöðina í morgun að þeir hefðu ákveðið að yfirgefa borgina til að koma í veg fyrir að Eþíópíumenn láti sprengjum rigna yfir hana til að myrða sómalska borgara.

Uppreisnarmennirnir höfðu ekki fyrr haldið á braut þegar skotbardagar hófust í borginni. Er talið að hinir gömlu stríðsherrar sem áður réðu þar lögum og lofum hafi verið þar á ferðinni til að tryggja yfirráð sín á ný. Fréttir eru þegar farnar að berast að gripdeildum og svo virðist sem Mógadisjú sé enn á ný stjórnlaus með öllu. Öryggisráð Sameinuðu þjóðanna fundaði annan daginn í röð um átökin í Sómalíu, sem þegar hafa kostað hundruð mannslífa, en gat ekki komið sér saman um orðalag ályktunar þar sem Katarar kröfðust þess að þar væri skorað á allt erlent herlið að yfirgefa landið.

Ýmis ríki, þar á meðal Bandaríkin, telja að hernaðaraðstoð Eþíópíumanna skipti höfuðmáli til að halda íslamistunum frá völdum, sem þau telja að tengist al-Kaída hryðjuverkanetinu. Þær grunsemdir fengu byr undir báða vængi í dag þegar hópur sem kallar sig "Íslamskt ríki í Írak" og tengist al-Kaída hvatti alla múslima til að styðja trúbræður sína í Sómalíu í baráttunni við óvininn, ýmist með því að senda þangað peninga eða vopn eða jafnvel taka þátt í sjálfum átökunum.