Sagði hernaðinn ekki virka

Skömmu áður en George W. Bush Bandaríkjaforseti skýrði frá því að Donald Rumsfeld varnarmálaráðherra myndi láta af störfum hafði Rumsfeld sagt nauðsynlegt að breyta algerlega um stefnu í Írak.

„Að mínu mati er þörf á miklum breytingum,“ sagði Rumsfeld í minnisblaði frá 6. nóvember, daginn fyrir þingkosningarnar í Bandaríkjunum og tveimur dögum áður en Bush tilkynnti að Rumsfeld myndi hætta.

„Það er greinilegt að það sem bandarískir hermenn eru að gera núna í Írak virkar hvorki nógu vel né nógu hratt,“ sagði ennfremur í minnisblaði Rumsfelds, sem átti að fara leynt en bandaríska dagblaðið New York Times gerði það opinbert á heimasíðu sinni seint á laugardagskvöld og á prenti í gærmorgun.

Í minnisblaðinu kemst Rumsfeld ekki að neinni niðurstöðu um það til hvaða aðgerða þurfi að grípa, en telur upp ýmsa möguleika, þar á meðal að „hugsa alveg upp á nýtt verkefni bandaríska hersins og markmið Bandaríkjanna (hvernig við tölum um þau) - fara naumhyggjuleiðina.“

Jafnframt sagði hann að Bandaríkjastjórn þurfi að „tilkynna að hvaða ákvörðun um nýjar leiðir sem Bandaríkin taka þá sé það gert í tilraunaskyni. Þetta gefur okkur tækifæri til að aðlagast á ný og fara aðrar leiðir, ef þörf krefur, og þar með að „tapa“ ekki.“