Mikill munur á samsetningu

Mun meiri munur er á genasamsetningu mannfólksins en áður var talið, kemur fram í nýrri breskri rannsókn sem fjallað er um á fréttavef breska ríkisútvarpsins, BBC.

Vísindamennirnir rannsökuðu genasamsetningu 270 manna og uppgötvuðu að stór hluti genanna getur verið til staðar í fleiri en tveimur afritum, eða vantað algjörlega. Til þessa hefur verið talið að hvert gen væri jafnan í tvíriti, þar sem annað eintakið kæmi frá móður en hitt frá föður.

Hingað til hafa vísindamenn einnig talið að DNA eins tiltekins einstaklings væri 99,9 prósent eins og upplag þess næsta, en nú virðist sem breytileikinn sé mun meiri.

„Það sem kom okkur einna mest á óvart var hversu breytilegt DNA-ið okkar er í afritafjölda. Við teljum þetta vera minnst 12 prósent af erfðamenginu. Breytileikinn í afritafjöldanum sem vísindamenn hafa séð áður var einfaldlega bara efsti toppurinn á ísjakanum á meðan meginhlutinn lá og maraði í kafi, óséður,“ sagði Matthew Hurles, vísindamaðurinn sem leiddi rannsóknina.

Sum þessara nýuppgötvuðu frávika eru í þeim hluta erfðamengisins sem hafa áhrif á heilsu okkar, að sögn Hurles, og munu niðurstðður rannsóknarinnar þess vegna breyta því hvernig vísindamenn leita að genum sem tengjast sjúkdómum.