Einn beið bana þegar fólksbíll og olíuflutningabíll skullu saman í Noregi

Einn maður beið bana þegar fólksbíll og olíuflutningabíll skullu saman í nágrenni Akershus í Noregi í gær. Við áreksturinn kviknaði mikill eldur en olíuflutningabíllinn var að flytja 28 þúsund lítra af bensíni og 13 þúsund lítra af olíu. Olíuflutningabíllinn stóð í ljósum logum þegar lögregla og slökkvilið kom á staðinn en það tók slökkviliðið um fjóra tíma að ráða niðurlögum eldsins. Talið er að ökumaður fólksbílsins hafi látist samstundis við áreksturinn. Ökumaður olíuflutningabílsins öklabrotnaði og slapp því ótrúlega vel.