Stuðningur við Bush minnkar

Eftir að fjórtán bandarískir hermenn létu lífið þegar að vegasprengja í Írak sprakk á miðvikudag, auk fjórtán hermanna sem létust á mánudag, hafa Bandaríkjamenn í vaxandi mæli krafist þess að George W. Bush kalli hermennina heim. Frá því innrásin í Írak hófst hafa 1.800 bandarískir hermenn látið lífið og samkvæmt nýrri könnun AP fréttastofunnar eru einungis 38 prósent Bandríkjamanna sáttir við hvernig Bush hefur staðið sig í Íraksmálinu. Aldrei áður hefur hann mælst með jafnlítinn stuðning í því máli og fyrir ári síðan voru jafnmargir sáttir og ósáttir. Bush sagði í gær að hann muni að engu hnika í Írak, en samkvæmt áætlun ætla Bandaríkjamenn næsta vor að fækka hermönnum sínum í Írak.