Leiðbeiningar um hryðjuverk

Lögregla í Indónesíu hefur lokað vefsíðu þar sem birtar eru ítarlegar leiðbeiningar um hvernig best sé að ráða útlendinga af dögum. Hún er talin runnin undan rifjum hryðjuverkamanna sem tengjast al-Kaída.

Á vefsíðunni var meðal annars birt kort af vinsælli verslunarmiðstöð í Jakarta og fylgdu því leiðbeiningar um hvernig best mætti tryggja að "skotmörkin" létust örugglega þegar skotið væri á þau. Annars staðar á síðunni er rætt um árásir á bíla en þar mátti sjá merkingar á korti af Jakarta þar sem umferðarhnútar væru líklegir. "Ekki ætti að miða á bílstjórann því hann er að öllum líkindum múslimi," segir þar.

Ekki er vitað hversu lengi vefsíðan var opin en talsmaður lögreglunnar segir að maður sem handtekinn var í síðustu viku vegna gruns um aðild að sprengjutilræði á Balí í síðasta mánuði hafi viðurkennt að hafa hannað síðuna.

Fréttirnar af vefsíðunni koma í kjölfar birtingar myndbands þar sem grímuklæddir menn sem sagðir eru félagar í samtökunum Jemaah Islamiyah hóta árásum og veifa byssum. Þau samtök er talin tengjast al-Kaída og sögð bera ábyrgð á 240 dauðsföllum síðan árið 2002.