Íranar hóta að svara fyrir sig

Ef vestræn ríki beita Írana hörðu verður þeim svarað í sömu mynt. Þetta sagði talsmaður utanríkisráðuneytis landsins í gær. Eina leiðin til að ná samkomulagi um kjarnorkuþróun Írana væri að setjast að fundarborðinu.

Bandaríkjamenn of háðir olíuríkjum

Bandaríkjamenn eru of háðir olíuríkjum þar sem stjórnarfar er bágborið. Þetta var meðal þess sem kom fram í stefnuræðu George Bush Bandaríkjaforseta í gær. Hann sagðist ætla að berjast fyrir því að meiri fjármunum yrði veitt í þróun tækni sem drægi úr þörf Bandaríkjanna fyrir olíu.

Sala á norrænum matvælum í Miðausturlöndum nær engin

Sala á norrænum matvælum í Miðausturlöndum er nær engin orðin eftir deiluna um skopmyndir Jótlandspóstsins af Múhammeð spámanni. Dansk-sænski matvælarisinn Arla Foods hefur þegar þurft að segja upp eitt hundrað manns í Miðausturlöndum vegna dvínandi eftirspurnar.

Ekkja Martins Luther King lést í dag

Bandaríski mannréttindafrömuðurinn Coretta Scott King lést í dag, 78 ára að aldri. Hún var ekkja blökkumannaleiðtogans Martins Luthers Kings, en eftir að hann var myrtur árið 1968 valdist hún sjálf í forystusveit þeirra sem börðust fyrir borgaralegum réttindum blökkumanna í Bandaríkjunum.

Flóð valda miklu tjóni í Noregi

Hundruð manna hafa yfirgefið heimili sín í Þrándalögum í Noregi vegna mikilla flóða. Mörg hús hafa horfið í vatnsflauminn, þar af eitt sem flaut 700 metra út á haf, niður ólgandi fljót sem áður var vart meira en lækur. Vatnið hefur rifið niður brýr og vegir hafa skolast burt. Óvenjuhlýtt er í Mið-Noregi, þannig að snjór hefur bráðnað og úrhellisrigningar hafa bætt um betur. Engar fréttir hafa borist af mannskaða.

Varnarmálaviðræður hefjast á fimmtudag

Stefnt er að því að viðræður um varnarmál milli Íslands og Bandaríkjanna hefjist að nýju á fimmtudag í Washington. Þetta var ákveðið á fundi Geirs H. Haarde, utanríkisráðherra og Nick Burns, aðstoðarutanríkisráðherra Bandaríkjanna í London í dag.

Danski Rauði krossinn flytur starfsmenn sína frá Miðausturlöndum

Ritstjórnarskrifstofur Jótlandspóstsins í Kaupmannahöfn og Árósum voru rýmdar nú síðdegis eftir að sprengjuhótun barst blaðinu. Nú skömmu fyrir fréttir var ákveðið að um gabb væri að ræða.

Forsætisráðherra Dana harmar deiluna milli Dana og múslima

Anders Fogh Rasmussen, forsætisráðherra Dana, harmar deiluna sem komin er upp milli Dana og múslima í Danmörku. Hann leggur áherslur á að mikilvægt sé til að leysa deiluna friðsamlega og það sem fyrst.

Hótunin var gabb

Sprengjuhótunin sem barst Jótlandspóstinum reyndist vera gabb. Full starfsemi er hafin í húsinu að nýju en lögreglan rannsakar málið.

Blóðug átök á Filippseyjum

Hersveitir skutu að minnsta kosti átján uppreisnarmenn til bana í smábæ á Filippseyjum í dag í blóðugustu átökum þarlendis í marga mánuði. Átök á milli stjórnarhers og sósíalískra uppreisnarmanna hafa þó staðið í nær hálfa öld á Filippseyjum.

Neita kröfum Sameinuðu þjóðanna

Hamas-samtökin hafa neitað kröfu Sameinuðu þjóðanna um að viðurkenna tilverurétt Ísraelsríkis og ætla ekki að leggja niður vopn. Þeir krefjast þess þó að Evrópusambandið haldi áfram fjárframlögum til Palestínu.

Ofsatrúarmenn í Írak hvetja til árása

Hópur herskárra ofsatrúarmanna í Írak hvetur meðlimi sína til að ráðast á þá Dani og Norðmenn sem meðlimirnir mögulega ná til. Ástæðan eru skopteikningarnar af spámanninum Múhameð sem birst hafa í dagblöðum í löndunum tveimur

Reykjavík er þriðja dýrasta borg heims

Osló er orðin dýrasta borg heims samkvæmt úttekt Greiningardeildar Economist. Reykjavík tekur stórt stökk upp á við, fer úr áttunda sæti í þriðja á listanum yfir dýrustu borgir heims.

Sauðdrukkinn rútubílstjóri

Drukkinn rútubílstjóri var rekinn úr vinnu sinni fyrir ölvunarakstur í Slagelse í Danmörku í gær. Farþegi í rútunni, sem var á leið frá Roskilde til Slagelse, veitti því athygli að bílstjórinn ók full glannalega og hafði samband við lögreglu. Lögreglan tók á móti honum er hann renndi í hlaðið á umferðamiðstöðinni í Slagelse og kom í ljós að áfengismagnið í blóði hans var yfir 1,5 prómíll og var hann því sviptur ökuleyfi og rekinn á staðnum.

Biðlar til Bandaríkjamanna

Nýtt myndband af bandarísku blaðakonunni Jill Carroll, sem haldið er í gíslingu í Írak, var sýnt á arabísku sjónvarpsstöðinni Al-Jazeera í gær. Biður Carroll Bandaríkjastjórn að sleppa úr haldi þeim konum sem enn eru í fangelsi í Írak, annars munu gíslatökumennirnir, sem kenna sig við Flokk hefndarinnar, taka hana af lífi. Fimm konum var sleppt í síðustu viku úr íröskum fangelsum en fjórar sitja enn inni.

Mál Írana fyrir öryggisráðið

Öryggisráð Sameinuðu þjóðanna tilkynnti í gærkvöld að mál Írana vegna kjarnorkuáætlana þeirra yrði tekið fyrir í Öryggisráðinu. Ekki hefur verið ákveðið hvort refsiaðgerðum gegn þeim verði beitt en málið verður tekið fyrir í mars. Breskur stjórnarerindreki sagði að loknum viðræðum við fulltrúa Íransstjórnar í gær að þær hefðu engu skilað. Íranar sögðu hins vegar að viðræðurnar hefðu gengið vel og að frekari viðræður væru framundan.

Myndlist eftir Hitler á uppboði

Til stendur að bjóða upp tuttugu og eitt listaverk eftir Adolf Hitler á uppboði hjá Jeffrey's í Bretlandi. Um er að ræða vatnslitamyndir og skissur eftir kappann sem hann ku hafa gert á árunum 1916 til 1918. Myndirnar fundust í kistli á háalofti einu í gömlu húsi í Belgíu þar sem þær höfðu legið í um sjötíu ár. Þrátt fyrir að þykja ekki mikið augnakonfekt er gert ráð fyrir að fyrir myndirnar fáist rúmlega ellefu milljónir íslenskra króna eða um hálf milljón fyrir hverja þeirra.

Neita að viðurkenna Ísraelsríki

Hamas-samtökin hafa neitað kröfu Kofis Annan, framkvæmdastjóra Sameinuðu þjóðanna um að viðurkenna tilverurétt Ísraelsríkis og að afneita ofbeldisverkum. Æðstu ráðamenn innan Hamas hafa þó beðið ESB um að stöðva ekki fjárstuðning sinn við Palestínu en aðildarríkin veittu rúma 36 milljarða króna til Palestínu í fyrra.

Mikill ótti á nautaati í Mexíkó

Mikill ótti greip um sig á nautaati í Mexíkóborg í gær þegar þúsund punda naut að nafni Pajarito eða litli fugl, gerði sér lítið fyrir og stökk upp í áhorfendastúku með þeim afleiðingum að yfir tíu manns slösuðust. Eins og sést á myndum af atburðinum reyndi tryllt dýrið að komast upp áhorfendapallana en mannskepnan hafði þó betur og stakk dýrið til bana með sverði. Mikil mildi þykir að ekki hafi farið verr en tveir voru þó lagðir inn á spítala með minniháttar meiðsli.

Bandaríkjamenn koma Dönum til bjargar

Bandaríkjamenn koma dönskum útflutningi til bjargar í kjölfar þess að danskar vörur hafa verið sniðgengnar meðal múslíma víða um heim. Á fjölmörgum bandarískum vefsíðum er hvatt til þess að menn kaupi danskar vörur og búist er við því að söluaukning verði á dönskum smjörkökum, bjór og skinku í Bandaríkjunum.

Námumönnum bjargað

Búið er að bjarga öllum upp úr kanadískri námu þar sem eldur kviknaði í gærmorgun. Alls voru 72 námamenn í námunni þegar eldurinn braust út og leituðu þeir skjóls í sérstökum öryggisherbergjum. Þar dvöldu þeir á meðan eldurinn var slökktur. Að sögn námufélagsins eru allir námamennirnir við góða heilsu.

Þrjár danskar stúlkur brunnu inni

Þrjár danskar stúlkur létust í nótt í eldsvoða í kofa í Noregi. Stúlkurnar, sem allar voru undir 18 ára aldri, voru í fjölmennum hópi danskra nema sem gistu í kofum í Hovden í Setesdal. Þrjú önnur ungmenni náðu að forða sér úr brennandi kofanum í tæka tíð.

Hvetur múslíma til að sýna stillingu

Anders Fogh Rasmussen, forsætisráðherra Danmerkur, hvatti í gær leiðtoga danskra múslíma til að lægja öldurnar meðal múslíma og taka afstöðu gegn því að danskar vörur verði sniðgengnar eins og átt hefur sér stað í fjölda ríkja í hinum íslamska heimi vegna birtingu á skopmyndum af Múhameð spámanni í Jótlandspóstinum.

Móðir brasilíubarns fundin

Simone da Silva var handtekin í Belo Horizonte í Brasilíu í dag. Hún segist hafa skilið nýfætt barn sitt í höndum heimilislausrar konu sem hún gekk fram á. Sjálf hafi hún ekki verið í sálrænu ástandi til að ala upp barn.

Þjóðarsorg í Póllandi

Þjóðarsorg ríkir í Póllandi eftir að sextíu og sjö manns létu lífið þegar þak sýningarhallar hrundi á fimm hundruð manns á laugardagskvöld. Pólverjar frá Katowice, sem búsettir eru hér á landi, segja að sýningarhöllin hafi augljóslega verið illa hönnuð.

Hamas verði að viðurkenna Ísrael

Angela Merkel, kanslari Þýskalands, segir vel koma til greina að ný stjórn Palestínu hljóti áfram stuðning Evrópusambandsins. Þó séu ákveðin skilyrði fyrir hendi þá meðal annars þau að stjórnin viðurkenni Ísraelsríki. Það hafa Hamas-samtökin hinsvegar þverneitað að gera.

Alvarlegri áhrif gróðurhúsalofttegunda

Aukin samþjöppun gróðurhúsalofttegunda getur haft alvarlegri áhrif en fyrr var talið að því er fram kemur í nýrri breskri skýrslu. Þar segir að litlar líkur séu á því að losun gróðurhúsalofttegunda verði haldið undir hættumörkum.

Íranar vilja forðast Öryggisráð SÞ

Íranar hafa óskað eftir fundi með fulltrúum Breta, Frakka og Þjóðverja í dag vegna deilunnar um kjarnorkuvopnaáætlun stjórnvalda í Teheran. Stjórn Alþjóða kjarnorkumálastofnunarinnar kemur saman síðar í vikunni og ræður ráðum sínum og gæti vísað málinu til Öryggisráðs Sameinuðu þjóðanna. Íranar ætla að freista þess að koma í veg fyrir það.

Lausir úr prísundinni

Sjötíu kanadískir námumenn eru nú lausir úr prísundinni eftir að hafa setið fastir í rúmlega sólarhring einn kílómetra undir yfirborði jarðar í kalsíum-námu í Kanada.

Þjóðverjar sniðganga Hamas

Ehud Olmert, starfandi forsætisráðherra Ísraels og Angela Merkel, kanslari Þýskalands ætla ekki að eiga samskipti við væntanlega heimastjórn Hamassamtakanna í Palestínu. Þetta sagði Olmert eftir fund þeirra Merkel í gær. Hann sagði kosningasigur Hamas í síðustu viku hafa verið óheppilegan, því Hamas væru hryðjuverkasamtök og þau myndu ekki fá fjármagn frá evrópskum hjálparsamtökum. Þá sagði Merkel að þýsk stjórnvöld myndu aðeins eiga samskipti við Hamas ef samtökin viðurkenndu Ísraelsríki og höfnuðu ofbeldi.

Fuglaflensan komin til Kýpur

Fuglaflensutilfelli af gerðinni H5N1 hefur greinst á tyrkneska hluta eyjunnar Kýpur. Þetta eru fyrstu veirutilfellin sem upp hafa komið á Kýpur, en engin tilfelli hafa fundist á gríska hluta eyjarinnar. Ríkisstjórnin hélt neyðarfund vegna málsins í gær en Kýpur er einungis um 75 kílómetra frá suðaustur-strönd Tyrklands þar sem fjórar manneskjur hafa dáið eftir að hafa smitast af H5N1 vírusnum.

Íranar láta undan kröfu Bandaríkjamanna

Írönsk stjórnvöld hafa látið undan kröfu Bandaríkjamanna um að leyfa eftirlitsmönnum Alþjóða kjarnorkumálastofnunarinnar að skoða svæði sem tengjast Lavizan herstöðinni í Teheran í Íran. Sagði sendimaður sem þekkir vel til mála, að eftirlitsmenn hefðu skoðað staði tengda Lavizan og séð búnaðinn sem þar er. Ekki hefur enn verið ákveðið hvort Rússar munu auðga úran fyrir írana eða hvort Öryggisráð Sameinuðu þjóðanna taki til skoðunar að beita Írana refsiaðgerðum vegna áætlana þeirra í kjarnorkumálum.

Fastir í rúmar tuttugu klukkustundir

Sjötíu kanadískir námamenn hafa nú setið fastir í rúmlega 20 klukkustundir um einn kílómetra undir yfirborði jarðar í kalsíum námu í Kanada. Eldur kviknaði í námunni og þurftu námamennirnir að leita skjóls í öryggisherbergi á meðan slökkviliðsmenn reyndu að ráða niðurlögum eldsins og tókst það seint í gærkvöldi.

Þrír létust og tugir slösuðust

Að minnsta kosti þrír létust og yfir fjörtíu eru slasaðir eftir að farþegalest fór út af teinunum í austurhluta Pakistans í gær en margir vagnanna féllu niður í gil samkvæmt AP fréttastofunni. Talið er að á bilinu 500 til 600 farþegar hafi verið um borð í lestinni sem var á leið frá Rawalpindi sem er nærri Islamabad til Lahore, höfuðborg Punjabhérað. Herinn hefur verið sendur á staðinn til að aðstoða við björgunarstörf sem hefur gengið brösulega vegna erfiðra aðstæðna en óttast er að tala látinna muni hækka á næstu dögum.

Tarja Halonen endurkjörin forseti

Sauli Niinisto viðurkenndi í gærkvöldi ósigur sinn í síðari umferð forsetakosninganna í Finnlandi, sem fóru fram í gær. Fékk Tarja Halonen, forseti Finnlands, 51,8 prósent atkvæða en Niinisto 48,2 prósent. Halonen, sem er 62 ára, sagði að sigurinn væri sögulegur því hún væri fyrsti kvenforseti landsins sem nær endurkjöri en Halonen var kjörin forseti Finnlands, fyrst kvenna, árið 2000. Hún hefur alltaf notið vinsælda en hún þykir alþýðleg, syndir reglulega í Eystrasalti og æfir magadans.

Danahatur breiðist út

Danahatur breiðist nú út í löndum múslima vegna skopmynda af Múhameð spámanni sem Jótlandspósturinn birti í haust. Hafa herskáir Múslímar á Gazasvæðinu sagt Skandinövum, sem staddir eru á Gaza, að koma sér í burtu og var kveikt í danska fánanum Dannebrog á Vesturbakkanum í gær.

Palestínskir öryggissveitarmenn mótmæla sigri Hamas

Hópur palestínskra öryggissveitarmanna lagði undir sig byggingu þingsins á Gasa-ströndinni í morgun. Vitni segja að þeir hafi farið inn með offorsi og hleypt af byssum sínum út í loftið. Með þessu vildu þeir láta í ljós óánægju sína með sigur Hamas-samtakanna í palestínsku þingkosningunum í síðustu viku.

ESB til varnar Danmörku

Evrópusambandið kemur Danmörku til varnar og mun leita til Alþjóðaviðskiptastofnunarinnar, WTO, hvetji stjórnvöld í arabaríkjum til þess að danskar vörur verði sniðgengnar. Danskar vörur hafa þegar verið fjarlægðar úr hillum í verslunum margra arabískra ríkja í mótmælaskyni við birtingu skopmynda af Múhameð spámanni í Jótlandspóstinum.

Sáttmáli í stað stjórnarskrár ESB

Anders Fogh Rasmussen, forsætisráðherra Danmerkur, hefur lagt til að gerður verði örsáttmáli á milli Evrópusambandsríkjanna í stað stjórnarskrárinnar sem flest bendir til að ekki verði að veruleika í núverandi mynd.

66 hafa fundist látnir í rústum sýningarhallarinnar í Póllandi

Enn hækkar tala látinna eftir slysið í Katowice í Póllandi, en nú hafa sextíu og sex lík fundist í rústum sýningarhallarinnar, en þak hennar hrundi í gær. Enginn hefur fundist á lífi síðan í gærkvöld.

Fréttateymi ABC fréttastofunnar lentu í sprengjuárás

Fréttamaður og myndatökumaður ABC fréttastofunnar er alvarlega særðir eftir sprengjuárás í bænum Taji í Írak í dag. Bob Woodruff fréttamaður og Doug Vogt myndatökumaður voru á ferð með írakska hernum þegar ráðist var á bílalest þeirra.

Síðari umferð forsetakosninga í Finnlandi í dag

Síðari umferð finnsku forsetakosninganna fara fram í dag en Törju Halonen tókst ekki að fá hreinan meirihluta í fyrri umferðinni sem fram fór fyrir tveimur vikum. Kosið verður á milli hennar og hægri mannsins Sauli Ninistoo en ekki er marktækur munur á fylgi þeirra samkvæmt nýjustu skoðanakönnunum.

Enn vandræði við réttarhöldin yfir Saddam

Réttarhöldin yfir Saddam Hussein hófust að nýju í morgun eftir stutt hlé. En gamanið stóð stutt að þessu sinni, því Hussein yfirgaf réttarsalinn í mótmælaskyni stuttu eftir að réttur var settur, í kjölfar þess að verjendur hans höfðu stormað út úr salnum.

Sextíu látnir eftir að þak sýningarhallar hrundi í Póllandi

Sextíu lík hafa fundist í rústum sýningarhallarinnar í Katowice í Póllandi en þak hennar hrundi í gær. Grimmdargaddur er á þessum slóðum og því er lítil von til að fleiri finnst þar á lífi.

Eldfimt ástand í Palestínu

Ástandið í Palestínu er eldfimt í kjölfar þingkosninga í síðustu viku. Slegið hefur í brýnu milli Hamas-liða, sem sigruðu, og stuðningsmanna Fatah. Íslenskur lektor segir hættu á að almenningur missi tiltrú á Hamas-samtökunum.