Íranar vilja forðast Öryggisráð SÞ

Íranar hafa óskað eftir fundi með fulltrúum Breta, Frakka og Þjóðverja í dag vegna deilunnar um kjarnorkuvopnaáætlun stjórnvalda í Teheran. Stjórn Alþjóða kjarnorkumálastofnunarinnar kemur saman síðar í vikunni og ræður ráðum sínum og gæti vísað málinu til Öryggisráðs Sameinuðu þjóðanna. Íranar ætla að freista þess að koma í veg fyrir það.

Stjórn kjarnorkumálastofnunarinnar kemur saman á fimmtudag til að ræða rök Bandaríkjanna og Evrópusambandsins fyrir því að vísa deilunni til Öryggisráðsins þar sem hægt verði að ræða mögulegar refsiaðgerðir gegn stjórnvöldum í Teherean. Grunur leikur á að Íranar ætli að auðga úran til kjarnorkuvopnaframleiðslu þó þeir haldi því fram að það sé aðeins gert í friðsamlegum tilgangi.

Talsmaður bresku stjórnarinnar segir fulltrúa Breta, Frakka og Þjóðverja funda með helsta samningamanni Írana í kjarnorkumálum í Brussel og hlusta á málflutning hans. Evrópuveldin þrjú ætla að samræma stefnu sína við fulltrúa Bandaríkjanna, Kína og Rússlands og munu utanríkisráðherrar ríkjanna sex funda í Lundúnum síðar í dag. Þar munu Bandaríkjamenn og Evrópusambandsríki reyna að fá Kínverja og Rússa til að samþykkja hertari aðgerðir í deilunni. Íranar hafa lýst því yfir að þeir ætli að banna skyndieftirlit alþjóðlegar eftirlitsmanna verði deilunni vísað til ráðsins.

Rússar hafa boðist til að taka að sér að auðga úran fyrir Írana og er það tilboð í skoðun. Ýmsar þjóðir hafa þó efasemdir um hversu heilir Íranar séu í þeim viðræðum, þeir séu aðeins að taka þátt í þeim til að kaupa tíma.

Indverjar ætla að sitja hjá þegar kemur að atkvæðagreiðslu um málið á fundi stjórnar kjarnorkumálastofnunarinnar.

Sendiherra Bandaríkjanna á Indlandi sagði í síðustu viku að ef Indverjar greiddu ekki atkvæði gegn stjórnvöldum í Teheran gæti samningur Bandaríkjamanna og Indverja um samvinnu í kjarnorkumálu verið í hættu. Háttsettur sendifulltrúi Indverja segir ekki hægt að greiða atkvæði í málinu þegar þessi ummæli hafi verið látin falla.