Lögðu þinghús undir sig

Byssumenn á vegum Fatah-hreyfingarinnar og palestínskar lögreglusveitir tóku völdin í byggingum þings Palestínumanna á Vesturbakkanum og Gasaströndinni um hádegisbilið í dag. Það varði þó í skamma stund. Vildu þeir vekja athylgi á andúð sinni á Hamas-samtökunum, sem unnu stórsigur í þingkosningum Palestínumanna í vikunni.

14 lið í snjóskurðarkeppni

14 lið víðsvegar að úr heiminum komu saman í Colorado í Bandaríkjunum í vikunni til að taka þátt í snjóskurðarkeppni sem þar er haldin. Hvert keppnislið fékk 65 klukkustundir til að ljúka við listaverk sem er skorið úr 20 tonna snjóklumpi.

20 ár frá Challenger slysinu

20 ár eru liðin frá því að geimskultan Challenger fórst með sjö áhafnarmeðlimum þegar tilraun til flugtaks mistókst. Sjö geimfarar fórust í slysinu og var geimferðum Bandaríkjamanna frestað um tíma vegna þess.

Vopnahlé verður ekki virt

Spenna magnast meðal Palestínumanna í kjölfar palestínsku þingkosninganna í vikunni. Leiðtogar Hamas-samtakanna, sigurvegara kosninganna, hafa hafnað óskum alþjóðasamfélagsins um að afvopnast og liðsmenn í Hersveit Al-Aqsa píslarvottanna segjast ekki ætla að virða vopnahlé og segja byssukúlum sínum verða beint gegn Ísraelsmönnum og liðsmönnum Fatah.

Nýtt bóluefni gegn fuglaflensu

Vísindamenn við Háskólann í Pittsburgh í Bandaríkjunum segja að þeim hafi tekist að framleiða bóluefni gegn fuglaflensu sem hægt verði að búa til með hraði. Það bóluefni sem nú er notað er ræktað í frjóvguðum hænueggjum og því tekur framleiðslan margar mánuði.

250 ára fæðingarafmæli Mozarts

Bjöllum var hringt í kvöld í Salzburg í Austurríki þar sem fagnað var 250 ára fæðingarafmæli tónskáldsins Wolfgangs Amadeusar Mozarts. (LUM) Það má segja að Motzart æði hafi farið um heimsbyggðina í dag og fæðingarafmælinu fagnað í helstu borgum heims. Hátíðarhöldin voru þó mest í fæðingarbænum Salzburg. Þar komu fjölmargir tónlistarmenn saman og hylltu meistarann með því að leika hans frægustu verk. Mozart samdi rúmlega 600 tónverk fyrir andlát sitt en hann var aðeins 35 ára þegar hann hvarf yfir móðuna miklu. Hann samdi fyrstu simfóníu sína fyrir 10 ára afmæli sitt og fystu óperuna 12 ára. Hann átti stóran þátt í að breyta óperu-listinni í það sem við þekkjum í dag.

Rau allur

Johannes Rau, fyrrverandi forseti Þýskalands, lést í dag, 75 ára að aldri. Ekki liggur fyrir á þessari stundu hvert banamein hans var en Rau hafði verið heilsuveill síðustu ár.

Hamas-liðar og stuðningsmenn Fatah berjast

Til skotbardaga kom milli Hamas-liða og palestínskra öryggissveita á suður hluta Gasa-strandarinnar í kvöld. Fyrstu fréttir herma að þrír hafi særst í átökunum. Fulltrúar öryggissveitanna segj að Hamas-liðarnir hafi skotið á höfðustöðvar þeirra og þeir því svarað í sömu mynt. Fyrr í dag særðust þrír í átökum Hamas-liða og stuðningsmanna Fatah í Khan Younis. Gríðarleg spenna hefur myndast milli Hams-liða og stuðningsmanna Fatah eftir að hinir fyrrnefndu unnu meirihluta á palestínska þinginu í kosningum í fyrradag.

Hamas falin myndun ríkisstjórnar

Mahmoud Abbas, forseti Palestínu, hefur falið Hamas-samtökunum að mynda nýja ríkisstjórn en þau unnu stórsigur í palestínsku þingkosningunum í fyrradag. Engin breyting hefur orðið á afstöðu leiðtoga Vesturveldanna til samtakanna.

Níu létust í rútuslysi í Svíþjóð

Í það minnsta níu manns biðu bana og tugir slösuðust í alvarlegu rútuslysi í Mið-Svíþjóð um hádegisleytið í dag. Fimmtíu farþegar voru um borð í rútunni sem virðist hafa runnið af ísilagðri hraðbrautinni á mikilli ferð.

Öflugur jarðskjálfti austur af Indónesíu

Öflugur jarðskjálfti sem mældist 7,7 á Richter varð í Banda-hafi, skammt austur af Indónesíu, nú laust fyrir klukkan 18. Ekki vitað hvort flóðbylgja hafi myndast af hans völdum.

11 milljarða króna pottur í Evrópulottóinu

Lottó-æði virðist hafa gripið um sig í Evrópu nú þegar potturinn í Evrópulottóinu er jafnvirði rúmlega 11 milljarða íslenskra króna. Enginn hefur verið með allar tölur réttar í lottóinu síðan í nóvember í fyrra og því skal engan undra að vinningsupphæðin sé svona há nú.

Hundasirkus í Hong Kong

10 hæfileikaríkir japanskir hundar skemmtu áhorfendum í Hong Kong í dag í tilefni þess að ár hundsins gengur í garð á sunnudag samkvæmt kínverska tímatalinu.

2 milljónir Sómala þurfa matvælaaðstoð

Rúmlega tvær milljónir Sómala þurfa nauðsynlega á matvælaaðstoð að halda nú þegar vegna alvarlegra þurrka sem hafa herjað á landið. Sérfærðingar Sameinuðu þjóðanna segja uppskeruna í landinu nú ekki hafa verið jafn rýra í heilan áratug enda hefur ekki rignt í landinu síðastliðin þrjú regntímabil.

Átta látnir og 40 slasaðir eftir rútuslys

Að minnsta kosti átta létu lífið og rúmlega 40 slösuðust, þar af 20 alvarlega, þegar rúta með fimmtíu farþegum um borð hafnaði á hvolfi, ofan í gilskorningi, rétt vestan við Stokkhólm um hádegisbilið. Ekki er vitað um tildrög slyssins, en svo virðist sem rútan hafi farið út af veginum, oltið og runnið um eitthundrað metra á hliðinni, þar til hún hrapaði ofan í tíu til fimmtán metra djúpan gilskorning. Þar lenti hún á hvolfi og þakið lagðist saman að mestu leyti. Björgunarsveitir hafa skriðið inn í flakið og segja að aðkoman hafi verið hræðileg. Lögregla segir sjö enn sitja fasta í flaki rútunnar.

Abbas vill að Hamas-samtökin myndi stjórn

Mahmoud Abbas, forseti Palestínu, ætlar að fela Hamas-samtökunum stjórnarmyndun í landinu eftir sigur samtakanna í þingkosningunum í fyrradag. Hamas hefur ljáð máls á því að mynda samsteypustjórn með Fata, flokki Abbas, en því hafnar Fata-flokkurinn.

Kennarar braska með hlutabréf í stað þess að kenna

Í mörgum skólum er slæm mæting nemenda mikill höfuðverkur fyrir kennara. Þessu er hins vegar öfugt farið í sumum skólum í Sádi-Arabíu, ef marka má nýjustu fréttir þaðan. Kennarar þar í landi hafa nefnilega sumir hverjir verið staðnir að því að fara fyrr heim úr vinnunni, eða mæta ekkert yfir höfuð, til að kaupa og selja hlutabréf á hlutabréfamarkaðnum

Sendiherra Sádi-Araba kallaður heim frá Danmörku

Sádi-Arabar hafa kallað heim sendiherra sinn í Danmörku. Ástæðan er að sögn danska ríkisútvarpsins sú að ríkisstjórnin hefur ekkert látið til sín taka vegna teikninga sem Jótlandspósturinn birti af Múhameð spámanni en þar er hann teiknaður með sprengju í höfuðfati sínu.

Myndbandsupptaka af þýskum gíslum í Írak

Myndbandsupptaka af tveimur Þjóðverjum sem mannræningjar í Írak hafa í haldi í sínu var sýnd á sjónvarpsstöðinni al-Jazeera nú fyrir stundu. Fréttamaður stöðvarinnar sagði gíslana biðja þar um hjálp þýskra stjórnvalda við að fá sig lausa, en ekki fylgdi sögunni hvaða kröfur þyrfti að uppfylla svo af því gæti orðið.

Þrumuveður slær á skógarelda í Ástralíu

Þrumuveður hefur slegið aðeins á skógareldana sem geisað hafa í Suðaustur-Ástralíu undanfarna daga. Eldarnir hafa kostað þrjú mannslíf, eyðilagt á þriðja tug heimilia og drepið mikinn búfénað, þar á meðal um 60 þúsund kindur, 500 nautgripi og tæplega 200 alifugla.

Tap General Motors 288 milljarðar á síðasta ári

Tap General Motors, stærsta bílaframleiðanda heims, nam 288 milljörðum íslenskra króna á síðasta ári. Ástæður fyrir slæmu gengi segja forsvarsmenn fyrirtækisins vera minnkandi sölu heima fyrir, hækkandi launakostnað og aukna samkeppni við Asíuríkin, sérstaklega Toyota bílaframleiðandann.

Segja Ísraelsher hafa skotið unga stúlku til bana

Ísraelski herinn skaut til bana tíu ára palestínska stúlku nærri Gaza landamærunum í gær, að sögn palestínskra yfirvalda. Ísraelski herinn segist enga vitneskju hafa um atburðinn og efi stórlega að palestínsk yfirvöld segir satt rétt frá.

Saka Ísraela, Beta og BNA-menn um að skapa óöryggi í Íran

Írönsk stjórnvöld segjast hafa upplýsingar um að Bandaríkjamenn, Bretar og Ísraelar hafi átt hlut að máli þegar tvær íranskar herflugvélar fórust og með þeim fjöldi manns á dögunum.

1.200 metra neðanjarðargöng fundust milli BNA og Mexíkó

Bandarísk yfirvöld fundu á miðvikudag yfir tólf hundruð metra löng neðanjarðargöng sem eru undir landamæri Mexíkó og Bandaríkjanna. Í göngunum fundust um tvo tonn af maríjúana að sögn fíkniefnalögreglunnar og má því ætla að göngin hafi verið nýtt til innflutnings á fíkniefnum til Bandaríkjanna.

Lítill áhugi fyrir samstarfi við Hamas flokkinn

Mikil fagnaðarlæti brutust út í Palestínu í gær þegar ljóst var að Hamas-samtökin höfðu unnið sigur í þingkosningunum sem fram fóru á miðvikudag. Hamas fékk 76 þingsæti en Fatah-hreyfingin, sem situr í ríkisstjórn, 43 þingsæti.

Hams og Fatah takast á

Til átaka kom milli stuðningsmanna Hamas-samtakanna og Fatah-flokks Mahmouds Abbas, forseta Palestínumanna, fyrir utan þinghús heimastjórnarinnar í dag. Hamas-liðar vildu flagga fána sínum á þinghúsinu en það mislíkaði stuðningsmönnum Fatah.

Ráðamenn kallðir fyrir þingnefnd

Svo gæti farið að Cheney, varaforseti Bandaríkjanna, og Rumsfeld, varnarmálaráðherra, verði kallaðir fyrir nefnd Evrópuþingsins sem rannsakar ásakanir um að bandaríska leyniþjónustan, CIA, hafi starfrækt leynifangelsi í ríkjum Evrópusambandsins.

Eyðileggja raddbönd hundanna

Þótt hundar séu á hverju strái í kínversku borginni Gvansú heyrist þar varla lengur gelt. Borgaryfirvöld hafa nefnilega ákveðið að rukka hundaeigendur um tugi þúsunda króna fyrir að taka að sér þennan besta vin mannsins.

Friðarhorfur í algjörri óvissu

Friðarhorfurnar fyrir botni Miðjarðarhafs eru í algerri óvissu eftir að í ljós kom að Hamas-samtökin herskáu hefðu unnið stórsigur í palestínsku þingkosningunum í gær. Fatah-hreyfingin fékk ekki nema 43 þingsæti en Hamas-samtökin 76.

Stórsigur Hamas-fylkingarinnar

Hamas-fylkingin vann stórsigur í þingkosningum Palestínumanna í gær og hlaut 76 þingsæti. Fatah-flokkur Mahmouds Abbas, forseta, fékk aðeins 43 sæti. Þetta sýna fyrstu tölur frá kjörstjórn sem birtar voru nú síðdegis. Stjórnmálaskýrendur segja þessa niðurstöðu veikja vonir um að hægt verði að hefja friðarferlið fyrir botni Miðjarðarhafs að nýju á næstunni.

Palestínumenn vilja ekki óbreytt ástand

Bush Bandaríkjaforseti segir úrslit þingkosninga Palestínumanna í gær vísbendingu um að Palestínumenn séu óánægðir með ástand mála í heimastjórninni. Hann telur þó rétt að Mahmoud Abbas, forseti Palestínumanna, verði áfram við völd.

Bandaríkjamenn aðvara Hamas-liða

Ekki verður haldið áfram með friðarviðræður vegna deilu Ísraela og Palestínumanna ef Hamas-samtökin, sigurvegarar í palestínsku þingkosningunum í gær, viðurkenna ekki tilverurétt Ísraelsríkis. Þetta sagði Condoleezza Rice, utanríkisráðherra Bandaríkjanna, þegar hún ávarpaði Heimsviðskiptaráðstefnuna í Davos í Sviss í dag.

Sprenging í Rúmeníu

Að minnsta kosti einn lét lífið og 3 slösuðust þegar sprenging varð í verksmiðju í Suður-Rúmeníu í dag. 1000 íbúðir í nálægum byggingum eyðilögðust og fjölmargir bílar einnig sem lagt hafði verið í næsta nágrenni. Ekki liggur fyrir hvað olli sprengingunni.

Hamasliðar kokhraustir

Forsætisráðherra Palestínu hefur sagt af sér en í þingkosningunum í gær náðu hin herskáu Hamas-samtök það góðum árangri að þau hljóta að teljast sigurvegarar kosninganna. Hamas-liðar eru kokhraustir og hafa lýst yfir fullnaðarsigri í þingkosningunum.

Forsætisráðherra Palestínu segir af sér

Ahmed Qurie, forsætisráðherra Palestínu hefur sagt af sér og ríkisstjórnin öll. Þá hafa Hamas-samtökin lýst því yfir að þau hafi sigrað þingkosningarnar í Palestínu.

Símaráðgjöf fyrir barnaníðinga

Barnaníðingar geta nú leitað sér aðstoðar í Danmörku, nafnlaust. Heilbrigðisráðuneyti hefur ákveðið að koma á fót símaráðgjöf fyrir barnaníðinga á danska ríkissjúkrahúsinu. Þjónustusíminn er hugsaður fyrir barnaníðinga sem vilja leita sér aðstoðar en hann verður opinn í einn til fjóra tíma á viku.

Verkfalli flugmanna SAS í Danmörku er lokið

Flugmenn SAS í Danmörku ákváðu í dag að snúa aftur til vinnu eftir að hafa fundað með stjórnendum félagsins.

Google ritskoðað í Kína

Kínverjar geta senn farið að notfæra sér Google-leitarvélina á Netinu, en böggull fylgir skammrifi. Leitarvélin verður stillt þannig að tiltekin leitarorð sem tengjast pólitísku andófi skila engum niðurstöðum.

Íranar fagna tilboði Rússa

Íranar fagna tilboði stjórnvalda í Moskvu um að Rússar auðgi úran fyrir þá en segja nauðsynlegt að útfæra tilboðið betur. Stjórnvöld í Teheran hóta því að hefja auðgun úrans af fullum krafti ef kjarnorkudeilu þeirra við Vesturveldin verði vísað til Öryggisráðs Sameinuðu þjóðanna.

Ísraelar hindruðu kosningar í Austur-Jerúsalem

Mikil spenna ríkti á herteknu svæðunum í Palestínu enda hafa þingkosningar ekki farið þar fram í áratug. Í Austur-Jerúsalem fékk aðeins brot kjósenda að neyta atkvæðisréttar.

Spár benda til að Fatah fái flest atkvæði

Fyrstu útgönguspár benda til að Fatah-hreyfing Mahmouds Abbas hafi fengið um 46 prósent atkvæða í palestínsku þingkosningunum sem fram fóru í dag. Að því er Reuters-fréttastofan hermir fengu hin herskáu Hamas-samtök rétt rúmlega þrjátíu prósent.

Leitarsveit SOS-barnaþorpanna hefur uppi á börnum í Pakistan

Þrátt fyrir erfiðar aðstæður, látlausar rigningar og snjókomu, umhverfis skjálftasvæðið í Pakistan hefur leitar- og hjálparsveit SOS-barnaþorpanna haldið áfram uppteknum hætti við að finna og skrá börn sem eru ein á báti eftir jarðskjálftana. Nú eru 129 slík börn í umsjá SOS-barnaþorpanna og hefur þeim verið komið fyrir í barnaþorpum eða í neyðarskýlum SOS til bráðabirgða.

Góð kjörsókn í Palestínu

Kjörsókn í Palestínu hefur verið góð það sem af er degi en þar kjósa landsmenn nýtt þing, í fyrsta sinn í tíu ár. Útlit er fyrir að Hamas-hreyfingin fái nánast jafnmikið fylgi og Fatah-flokkur Mahmouds Abbas, forseta heimastjórnarinnar.

Walt Disney kaupir Pixar

Walt Disney hefur gert samning um kaup á teiknimyndafyrirtækinu Pixar á 7, 4 milljarða dollara eða sem samsvarar 455 milljörðum íslenskra króna og er áhætlað að öll hlutabréf Pixar verði komin í eigu Disney um mitt þetta ár. Ed Catmull verður forstjóri hins nýja sameinaða fyrirtækis Disney og Pixar. Steve Jobs einn af stofnendum Apple verður framkvæmdastjóri og formaður.

Fylgi Fata og Hamas flokkanna hnífjafnt

Kannanir benda til að fylgi Fata, flokks Abbasar forseta Palestínu, og Hamas, sem Ísraelsmenn telja hryðjuverkasamtök, sé hníf jafnt, en ellefu flokkar eru í framboði í þingkosningunum í Palestínu í dag.Sumir óttast að þar með verði friðarhorfur fyrir botni Miðjarðarhafs enn óljósari en aðrir benda á kosti þess að Hamas berjist fyrir markmiðum sínum á stjórnmálasviðinu í stað þess að grípa til hermdarverka.