Sala á norrænum matvælum í Miðausturlöndum nær engin

Sala á norrænum matvælum í Miðausturlöndum er nær engin orðin eftir deiluna um skopmyndir Jótlandspóstsins af Múhammeð spámanni. Dansk-sænski matvælarisinn Arla Foods hefur þegar þurft að segja upp eitt hundrað manns í Miðausturlöndum vegna dvínandi eftirspurnar.

Árleg sala keðjunnar á svæðinu er nærri þrjátíu milljarðar króna, en síðustu fimm daga hefur sama og ekkert selst. Enn bólar ekkert á formlegri afsökunarbeiðni frá dönskum stjórnvöldum, enda segir Anders Fogh Rasmussen forsætisráðherra að ríkisstjórnin geti einfaldlega ekki beðist afsökunar fyrir hönd dagblaðs, því að þeim sé ekki ritstýrt úr stjórnarráðinu.