Málið sem Trump getur ekki losað sig við

Trump-liðar vilja að hætt verði að tala um málið svo þeir geti snúið sér að því að tala um glæpi, efnahaginn og önnur mál sem þeir telja að gætu hagnast Repúblikönum í þingkosningunum í nóvember.

Það hefur þó ekki farið þannig, þar sem forsvarsmenn ráðuneytisins sögðust ekki geta birt gögnin í einu lagi. Meiri tíma þyrfti til að fara yfir þau og í staðinn yrðu þau birt í skömmtum yfir næstu vikur.

Við það hefur bæst að búið er að hylma yfir upplýsingar á fjölmörgum skjölum og myndum. Í einu tilfelli var 119 blaðsíðna skjal sett á vef ráðuneytisins en þegar það er opnað sést ekkert nema svartar síður.

Hefur þetta vakið upp spurningar um gagnsæi og hefur ríkisstjórn Trumps verið sökuð um að reyna að fela upplýsingar fyrir almenningi.

Sjá einnig: „Við vitum ekki hvað við vitum ekki“

Sjálfur er Trump sagður hafa kvartað yfir því við aðstoðarmenn sína og ráðgjafa hve mikinn áhuga Bandaríkjamenn hafa haft á málefnum Eppsteins. Samkvæmt frétt Wall Street Journal hafa embættismenn einnig viðurkennt að þeir hafi vanmetið áhuga fólks á málinu.

Trump hefur neitað að taka við spurningum blaðamanna á viðburðum síðustu daga, sem hann gerir sjaldan, og hefur ekki nefnt Epstein eða talað um skjölin í ræðum sínum.

Hét því að birta allt en hætti svo við

Áður en hann tók aftur við embætti hét Trump því að birta Epstein-skjölin öll og varpa ljósi á mál kynferðisbrotamannsins alræmda. Það tóku bandamenn hans og núverandi ráðherrar og embættismenn heilshugar undir.

Tóninn breyttist þó fljótt eftir að Trump settist að í Hvíta húsinu og hefur hann síðan þá ekki viljað opinbera skjöl tengd Epstein.

Það var ekki fyrr en nokkrir þingmenn Repúblikanaflokksins tóku höndum saman með Demókrötum og samþykktu lagafrumvarp sem skilyrti ráðuneytið til að opinbera gögnin sem hreyfing komst á hlutina.

Trump og Epstein voru miklir vinir á árum áður en deildu um fasteign í Flórída árið 2004 og mun það hafa leitt til þess að þeir hættu að vera vinir. Í bók sem Epstein fékk í gjöf þegar hann varð fimmtugur árið 2003 var meðal annars bréf sem mun vera frá Trump.

Þar talaði Trump um sameiginlegt leyndarmál þeirra og að þeir ættu ákveðna hluti sameiginlega.

Utan um textann frá Trump hafði verið teiknuð gróf mynd af líkama konu svo undirskrift Trumps leit út eins og skapahár hennar. Trump heldur því fram að bréfið hafi verið falsað.

Aldrei hefur verið ljóst af hverju Trump hefur verið á móti því að birta gögnin.

Flestir kjósendur ósáttir

Samkvæmt WSJ benda kannanir til þess að flestir kjósendur séu ósáttir við það hvernig Trump hefur haldið á spöðunum þegar kemur að Epstein-skjölunum. Það hefur þó breyst lítillega meðal skráðra Repúblikana á síðustu dögum.

Bandamenn Trumps telja að málið muni ekki koma niður á Repúblikönum í þingkosningunum í nóvember. Hogan Gidley, fyrrverandi talsmaður forsetans, segir til að mynda að málið sé smávægilegt samanborið við glæpi, landamærin og hagkerfið.

Gidley viðurkenndi þó að margir í grasrót MAGA-hreyfingarinnar verði áfram ósáttir, þar sem skjölin séu ólíkleg til að standast væntingar þeirra.

Repúblikanar óttast að Demókrötum gæti tekist að nota Epstein-málið til að draga úr kjörsókn helstu stuðningsmanna Trumps á næsta ári. Það hefur sýnt sig áður að þeir eru ólíklegri til að taka þátt í kosningum þegar Trump er ekki á kjörseðlinum og aukin óánægja þeirra gæti gert þá enn ólíklegri til að kjósa.