Upp­gjörið: Víkingur - Brönd­by 3-0 | Niður­lægðu gestina og Víkingar í frá­bærum málum

Víkingur er í ótrúlegri stöðu fyrir síðari leik sinn gegn Bröndby í forkeppni Sambandsdeildar Evrópu eftir sannfærandi, og sanngjarnan, sigur í Víkinni.

Eftir rólegar fyrstu fimmtán mínútur færðist fjör í leikinn og Nikolaj Hansen var allt í öllu.

Hann fékk fyrsta alvöru færi Víkinga, renndi boltanum rétt framhjá og bjargaði svo á línu hinum megin eftir skalla frá leikmanni Bröndby.

Rétt fyrir hálfleik skoraði Nikolaj svo stórbrotið skallamark, með hnakkanum, sláin inn. 

Ótrúlegt mark, með þrjá menn að dekka sig og bakið í markið tókst honum samt einhvern veginn að stýra boltanum á rammann eftir hornspyrnu Gylfa Þórs.

Víkingar fóru því með forystuna inn í hálfleik og tvöfölduðu hana snemma í seinni hálfleik, aftur eftir hornspyrnu Gylfa Þórs.

Þá voru augu allra varnarmanna Bröndby á Nikolaj Hansen og þeir hreinlega gleymdu Oliver Ekroth, sem voru slæm mistök. Oliver þakkaði fyrir sig, stökk óvaldaður og stangaði boltann í netið.

Bröndby var næstum því búið að minnka muninn strax í næstu sókn en Pálmi Rafn varði stórkostlega. Eftir það vörðust Víkingar virkilega vel og ógnuðu mikið í sínum sóknum. Það var svo varamaðurinn Viktor Örlygur Andrason sem gulltryggði magnaðan sigur Víkinga með frábæru skoti með vinstri fæti úr teignum. 

Lokatölur 3-0 og Víkingar svífa til Kaupmannahafnar á bleiku skýi. Nánara uppgjör og viðtöl væntanleg.

Atvik leiksins

Stjörnur og skúrkar

Gylfi Þór Sigurðsson stórstjarna kvöldsins með tvær stoðsendingar. Nikolaj Hansen hættulegastur allra. Oliver Ekroth með stórbrotna frammistöðu. Pálmi Rafn frábær í markinu.

Svo einhverjir séu nefndir, annars var allt Víkingsliðið upp á sitt allra besta í kvöld.

Skúrkar Bröndby eru þessir þrír sem voru settir á Nikolaj Hansen í horninu, ótrúlegt að engum af þeim hafi tekist að halda honum aftur.

Stemning og umgjörð

Umgjörðin hin allra glæsilegasta í Víkinni og ólöglegar veigar til sölu sem glöddu mannskapinn mikið.

Stemningin með allra besta móti, þangað til stuðningsmenn Bröndby ákvaðu að skemma fyrir. Fýlupúkar sem höndluðu ekki niðurlæginguna og létu ferðaklósettin finna fyrir því.

Fáránleg hegðun sem þeir sýndu og sem betur fer hlaut enginn alvarlegan skaða af.

Stuðningsmenn Víkings mættu þeim með brosi á vör og voru upp á sitt besta í kvöld.