„Við leiddum óvininn í Bakhmut-gildru“

Rússar stjórna rúmum níutíu prósentum af Bakhmut, ef svo má segja, en bærinn hefur að mestu verið lagður í rúst, enda hafa gífurlega harðir bardagar geysað þar frá síðasta sumri. Mikið kapp hefur verið lagt á að ná Bakhmut og eru Rússar sagðir hafa orðið fyrir gífurlegu mannfalli í bænum.

Úkraínskir hermenn hafa sömuleiðis lýst aðstæðum sem mjög erfiðum. Í samtali við New York Times sögðu hermenn sem voru nýkomnir frá Bakhmut að Rússar létu ekki af stórskotaliðs- og loftárásum. Þær væru stöðugar og notuðu hermenn í sömu herdeild dróna til að fanga meðfylgjandi myndir af bænum á laugardaginn.

Um sjötíu þúsund manns bjuggu í Bakhmut fyrir innrás Rússa.

Fyrr á árinu lögðu bakhjarlar Úkraínumanna til að þeir hörfuðu frá Bakhmut og kæmu sér fyrir í betri varnarstöðum vestur af bænum. Það var ekki tekið í mál og Úkraínumenn telja þjáningar þeirra í Bakhmut vera þess virði. Markmið þeirra hafi verið að draga úr mætti Rússa í aðdraganda væntanlegrar gagnsóknar Úkraínumanna í vor eða sumar.

Úkraínumenn eru taldir hafa óttast að ef þeir hörfuðu frá Bakhmut til vesturs, myndu Rússar lýsa yfir sigri og hætta að reyna að sækja fram. Þess í stað gætu þeir varið þeim mannafla sem þeir hafa notað í Bakhmut til að styrkja varnir sínar annarsstaðar á víglínunni í Úkraínu.

Sjá einnig: Af hverj­u vilj­a Úkra­ín­u­menn hald­a Bak­hmut?

Varnarmálaráðherra Úkraínu sagði í gær, samkvæmt frétt Wall Street Journal, að Rússar hefðu sent liðsauka til Bakhmut í kjölfar árása Úkraínumanna norður og suður af bænum.

Varnarmálaráðuneyti Rússlands hefur neitað því að Úkraínumenn hafi náð árangri norður og suður af Bakhmut. Þess í stað segir ráðuneytið að rússneskir hermenn hafi fært sig og tekið upp betri varnarstöður. Ríkismiðlar Rússlands hafa þó sagt frá því að tveir ofurstar hafi fallið í átökum nærri Bakhmut.

Segir Rússa hafa misst fjölmarga menn

„Við leiddum óvininn í Bakhmut-gildru,“ hefur miðillinn eftir Serhiy Cherevatiy, talsmanni herafla Úkraínu í austri. Hann sagði Rússa hafa misst gífurlega marga menn og að Úkraínumenn væru enn að láta þá blæða í bænum.

Yfirvöld Í Bandaríkjunum sögðust í síðasta mánuði telja að um tuttugu þúsund rússneskir hermenn og málaliðar hefðu fallið í Úkraínu frá áramótum og þar af flestir í Bakhmut. Hvíta húsið sagði einnig að um áttatíu þúsund hermenn og málaliðar hefðu særst á tímabilinu.

Sjá einnig: Hundrað þúsund rússneskir hermenn fallið eða særst síðan í desember

Úkraínumenn hafa einnig orðið fyrir mannfalli en forsvarsmenn úkraínska hersins segja að þær nýju hersveitir sem hafi verið myndaðar vegna væntanlegrar gagnsóknar Úkraínumanna hafi ekki komið að átökunum í Bakhmut.

Úkraínskir hermenn sem ræddu við WSJ segja baráttuanda þeirra hafa batnað mjög eftir árangurinn við Bakhmut. Þeir hafi varið mánuðum í að gera ekkert nema verjast og hafi nú á tilfinningunni að taflið sé mögulega að snúast og þeir að fá vindinn í bakið.