Grunar að ör­loft­steinn hafi valdið skemmdum á geim­ferju

Sérfræðingar á jörðu niðri urðu lekans varir rétt áður en rússnesku geimfararnir Sergei Prokopjev og Dmitrí Petelín ætluðu í fyrirhugaða geimgöngu. Þeir sáu vökva streyma frá Soyuz-geimferjunni í beinu streymi vefmyndavélar utan á geimstöðinni. Á sama tíma féll þrýstingur á mælum ferjunnar, að sögn AP-fréttastofunnar.

Geimgöngunni var frestað vegna lekans. Bæði Roscosmos, rússneska geimstofnunin, og sú bandaríska, segja að uppákoman ógni ekki öryggi sex manna áhafnar geimstöðvarinnar. Lekinn gæti hins vegar haft áhrif á kælikerfi geimferjunnar og hitann á tækjabúnaði hennar.

Prokopjev, Petelín og bandaríski geimfarinn Frank Rubio flugu til geimstöðvarinnar með ferjunni í september. Hún liggur við geimstöðina og er ætluð til að koma geimförunum undan ef neyð kallar.

Ákvörðun um framhald núverandi leiðangurs um borð í geimstöðinni verður tekin þegar búið að er leggja mat á ástand geimferjunnar, að sögn Sergeis Krikalev, yfirmanns mannaðra geimferða hjá Roscosmos.