75 ára kona barin, skorin og nauðgað

Rússar hafa þegar flutt fjölmarga íbúa héraðsins til Rússlands og stendur til að flytja enn fleiri. Frá leppstjórunum heyrist að það sé vegna þeirrar ógnar sem stafar af mögulegri notkun Úkraínumanna á ólöglegum vopnum. Rússar hafa um nokkuð skeið haldið því fram að Úkraínumenn ætli að nota litla kjarnorkusprengju í héraðinu, án þess þó að geta fært nokkrar sannanir fyrir þessum ótrúverðugu yfirlýsingum.

Úkraínumenn segja þessar ásakanir vera fáránlegar en mögulega gæti þeim verið ætlað að koma sökinni á Úkraínumenn ef Rússar myndu nota slík vopn, samkvæmt frétt Reuters.

Yfirmenn herafla Úkraínu sögðu í tilkynningu á morgun að Rússar væru meðal annars að byggja upp varnir í kringum þorpi í Kherson með því að koma fyrir jarðsprengjum en einnig hafa borist fregnir af flutningum steyptra varnarbyrgja til héraðsins.

Rússar hafa á undanförnum vikum gefið í skyn að undanhald frá vesturbakka Dnipro kæmi til greina. Brottflutningur hermanna af svæðinu hefur stutt þær vangaveltur en Rússar hafa þó einnig verið flytja nýjar herdeildir og hergögn á vesturbakka árinnar.

Úkraínumenn hafa frá því í sumar staðið í sókn gegn Kherson-héraði sem lengst gekk mjög hægt og var mjög kostnaðarsöm. Rússar fluttu á svæðið sínar reyndustu herdeildir og hafa þeir hermenn verið á víglínum í marga mánuði, án hvíldar. Líklegt er að Rússar séu eingöngu að skipta út hermönnum á víglínum en ekki hörfa frá vesturbakkanum.

Í frétt New york Times segir að íbúar á héraðinu segjast finna fyrir auknum ógnunum og hertum aðgerðum rússneskra hermanna á svæðinu. Ógnanirnar hafi aukist samhliða framgöngu Úkraínumanna, en þeim hefur vegnað vel í héraðinu á undanförnum vikum.

Ruddist inn til hennar og barði úr henni tvær tennur

BBC birti í gær viðtal við 75 ára gamla konu frá þorpinu Myroliubivka í Kherson. Hún heitir Liudmyla Mymrykova en Úkraínumenn frelsuðu þorpið í síðasta mánuði. Hún sagði meðal annars frá því þegar rússneskur hermaður ruddist inn til hennar, barði hana grimmilega, skar hana og nauðgaði henni.

Liudmyla sagði fyrstu rússnesku hermennina hafa sést í þorpinu þann 24. mars. Þeir hafi ekki komið illa fram við íbúa en seinna meir hafi hermenn frá yfirráðasvæðum aðskilnaðarsinna í Luhansk og Donetsk komið. Þeir hafi haldið íbúum þorpsins í skelfingu með ránum og gripdeildum, auk þess sem þeir pyntuðu menn og þá minnst einn til dauða.

Í apríl bauðst Liudmylu að yfirgefa þorpið með dóttur sinni en hún neitaði, því hún vildi verja húsið sitt og gögnin sem hún hafði safnað um sögu þorpsins og fjölskyldu hennar. Hún starfaði á árum áður sem kennari og var þekkt sem sagnfræðingur þorpsins.

Um miðjan júlí ruddist rússneskur hermaður inn á heimili hennar, kýldi hana í andlitið en við það braut hann nef hennar og sló úr henni tvær tennur. Hann barði hana einnig með byssunni sinni. Seinna henti hann henni í sófann og byrjaði að kyrkja hana. Hún segir hann þó hafa hætt því og nauðgað henni. Í kjölfarið skar hann hana á maganum.

Eftir að hann nauðgaði henni krafðist hann tóbaks af henni og þegar hún sagðist ekki eiga það byrjaði hann að skjóta úr byssu sinni inn í stofu hjá henni.

Liudmyla telur að umræddur hermaður hafi verið einn af aðskilnaðarsinnunum og að hann hafi áður komið inn á heimili hennar til að stela af henni olíu. Hann fór um morguninn en sagði við hana áður að ef hún segði frá myndi hann koma aftur og drepa hana.

Fjórum dögum síðar tókst henni að flýja til vesturs á yfirráðasvæði Úkraínumanna.

Liudmyla sagðist vilja heiminn til að stöðva þetta stríð eins fljótt og hægt væri.

„Ég vil að Rússar viti að eiginmenn þeirra, synir þeirra, foreldrar þeirra eru að pynta Úkraínumenn. Hvað höfum við gert. Við erum vinnusamt og friðsæmt fólk. Við ónáðum ekki neinn.“

Ný loftvarnarkerfi á næstu dögum

Rússar hafa svarað velgengni Úkraínumanna með dróna- og eldflaugaárásum á borgaraleg skotmörk og innviði í Úkraínu með því markmiði að draga úr baráttuvilja úkraínsku þjóðarinnar og stöðva stærri hluta hennar á flótta í vetur.

Úkraínumenn hafa í kjölfarið kallað eftir betri loftvörnum til að skjóta niður eldflaugar og íranska sjálfsprengjudróna sem Rússar hafa verið að nota gegn Úkraínumönnum.

Hópur úkraínskra hermanna er nú að ljúka þjálfun í Þýskalandi þar sem þeim hefur verið kennt á vestræn loftvarnarkerfi sem kallast NASAMS. Þar hafa norskir hermenn verið að kenna tæplega hundrað úkraínskum hermönnum að stjórna og viðhalda vopnakerfunum.

Ráðamenn í Bandaríkjunum segja slík loftvarnarkerfi geta verið send til Úkraínu á næstu dögum.