Erlent

Leppstjórar biðja Pútín um innlimun

Samúel Karl Ólason skrifar
Denis Pushilin, leiðtogi hins svokallaða Donetsk-lýðveldis, er hér við hlið þeirra Sergei Kiriyenko, sem starfar í Kreml, og Leonid Pasechnik, leiðtoga Luhansk-lýðveldisins. Bæði Pushilin og Pasechnik hafa beðið Pútin um að lýðveldin verði innlimuð.
Denis Pushilin, leiðtogi hins svokallaða Donetsk-lýðveldis, er hér við hlið þeirra Sergei Kiriyenko, sem starfar í Kreml, og Leonid Pasechnik, leiðtoga Luhansk-lýðveldisins. Bæði Pushilin og Pasechnik hafa beðið Pútin um að lýðveldin verði innlimuð. AP

Leppstjórar Rússlands í Luhansk- og Donetsk-héruðum hafa beðið Vladimír Pútín, forseta Rússlands, um að lýsa yfir innlimun héraðanna og annarra í rússneska sambandsríkið. Búist er við því að Pútín muni lýsa yfir innlimuninni á komandi dögum.

Leppstjórar Rússa í Saporisjía og Kherson lýstu yfir sjálfstæði frá Úkraínu í dag.

Rússar lýstu því yfir í síðustu viku að haldnar yrðu atkvæðagreiðslur í fjórum héruðum Úkraínu um innlimun og voru þær framkvæmdar í miklu snatri. Samkvæmt niðurstöðum Rússa kusu nánast allir íbúar innlimun. Þessi meinta atkvæðagreiðsla og væntanleg innlimun Rússlands á héruðunum er brot á alþjóðalögum og mun líklegast hafa lítið gildi fyrir aðra en Rússa.

Aðgerðunum er í raun ætlað að gefa yfirlýstri innlimun lögmæti varðandi rússnesk lög og ákvæði stjórnarskrár Rússlands.

Með þessu vilja Rússar, sem eru á hælunum víðast hvar í Úkraínu, saka Úkraínumenn um að gera árásir á Rússland, öfugt við það sem raunverulega er að gerast, að Úkraínumenn séu að verjast Rússum í Úkraínu. Innlimun gæti einnig gert Rússum kleift að kveðja úkraínska menn í rússneska herinn og reyna að láta þá berjast gegn Úkraínumönnum.

Ráðamenn í Rússlandi, og þar á meðal Pútín, hafa hótað notkun kjarnorkuvopna.

Héruðin sem Rússar ætla sér að reyna að innlima. Rússar stjórna engu héraði að fullu og Úkraínumenn hafa á undanförnum dögum sótt fram gegn Rússum í norðurhluta Donetsk og í Luhansk.

Segist ekkert hafa að ræða við Pútín

Vólódímír Selenskí, forseti Úkraínu, fordæmdi hina væntanlegu innlimun í gærkvöldi og hvatti þjóðir heimsins til að einangra Rússland enn frekar vegna hennar. Úkraínumenn hafa sagt að frekari friðarviðræður, sem hafa legið í dvala frá því ódæði rússneskra hermanna í Bucha og víðar urðu ljós, komi ekki til greina reyni Rússar að innlima hluta Úkraínu og Selenskí virtist staðfesta það í gær.

„Önnur tilraun til að innlima landsvæði Úkraínu þýðir að við höfum ekkert að ræða við forseta Rússlands,“ sagði forsetinn samkvæmt frétt Wall Street Journal (áskriftarvefur).

Hann sagði einnig að Úkraínumenn myndu ekki láta af hernaðaraðgerðum sínum og þeir myndu reka Rússa á brott frá öllum héruðum Úkraínu og þar á meðal frá Krímskaga, sem Rússar lýstu því yfir að þeir hefðu innlimað árið 2014, eftir sambærilega atkvæðagreiðslu og í þessari viku.

Þá sagði Recep Tayyip Erdogan, forseti Tyrklands, í dag að innlimunin kæmi niður á tilraunum til að endurvekja friðarviðræðurnar og binda enda á átökin. Hann sagði einnig fyrr í þessum mánuði að væntanlegt friðarsamkomulag ætti að fela í sér að Úkraínumenn fengju aftur yfirráð yfir öllum sínum héruðum og þar á meðal Krímskaga.

Jens Stoltenberg, framkvæmdastjóri Atlantshafsbandalagsins, sló á svipaða strengi í gær. Hann sagði að ríki bandalagsins myndu ekki láta af stuðningi sínum við Úkraínumenn, burtséð frá tilraunum Rússa til að innlima hluta ríkisins.

Herða refsiaðgerðir gegn Rússum

Ursula von der Leyen, forseti framkvæmdastjórnar Evrópusambandsins, tilkynnti í dag hertar refsiaðgerðir gegn Rússlandi, vegna stigmögnunar Rússa í Úkraínu. Þær aðgerðir fela meðal annars í sér aðgerðir gegn rússneskum ríkisborgurum og frekari takmarkanir á innflutningi frá Rússlandi.

Þá á að draga frekar úr aðgengi Rússa að tæknivörum frá Evrópu, sem margar hverjar eru sagðar nauðsynlegar hergagnaframleiðslu í Rússlandi.


Tengdar fréttir

Telja gasleiðslurnar geta skemmst varanlega

Óttast er að rússnesku gasleiðslurnar tvær í Eystrasalti kunni að skemmast varanlega eftir að skemmdarverk sem virðast hafa verið unnin á þeim. Þýski sjóherinn ætlar að taka þátt í rannsókn á lekanum.

Óttast lofts­lags­stór­slys vegna gas­lekans

Losun gróðurhúsalofttegunda frá lekanum í Nord Stream-gasleiðslunum tveimur í Eystrasalti gæti jafnast á við árslosun heillrar borgar. Vísindamenn óttast loftslagshamfarir en losun vegna lekans gæti í versta falli orðið umtalsvert meiri en árslosun Íslands.

Segja 99,23 prósent hafa stutt til­lögu um að heyra undir Rúss­land

Talsmenn leppstjórna Rússa í fjórum úkranskum hérðuðum hafa lýst því yfir að yfirgnæfandi meirihluti hafi greitt atkvæði með því að heyra undir Rússland, í svokölluðum „þjóðaratkvæðagreiðslum“ sem boðað var til og haldnar í gær.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.