Vísir fjallaði ítarlega um málið á föstudaginn og nú hafa tveir sveitarstjórnarmenn Ölfuss, þær Hrönn Guðmundsdóttir og Hrafnhildur Hlín Hjartardóttir, ritað grein sem þær birta í Hafnarfréttum þar sem þær harma að hafa samþykkt á fundi skipulagsnefndar 21. júlí síðastliðinn umsókn Heidelberg Cement um tæplega 5 hektara lóð undir vinnslu sements sem flytja á út til Evrópu.
Þær Hrönn og Hrafnhildur Hlín sátu umræddan fund sem fulltrúar XB Framfarasinna og segja að þær hefðu „aldrei átt að veita samþykki fyrir lóðaúthlutuninni enda endurspeglar þetta verkefni hvorki skoðun okkar persónulega né stefnumál framboðsins.“
Í greininni segjast þær þar hafa gengið gegn þeirri stefnu að laða til samfélagsins lítil og meðalstór fyrirtæki sem þessi áform séu sannarlega ekki. „Það er vont að fara gegn eigin sannfæringu og því langar okkur að leiðrétta þetta, viðurkenna mistök okkar og draga lærdóm af,“ segja þær Hrönn og Hrafnhildur Hlín. Sem leggja áherslu á að verkefni af þessari stærðargráðu að fara þurfi í ítarlega íbúakynningu en ekki eigi að taka ákvarðanir sem þessar í flýti og/eða undir pressu.
„Margur kann að hugsa að þessi grein sé skrifuð af pressu frá samflokksmönnum, H-listanum eða vegna umræðunnar í samfélaginu en það er svo sannarlega ekki málið. Þeir sem standa okkur næst vita að svo er ekki.
Málið búið að liggja þungt á okkur enda var okkur strax ljóst að við gerðum mistök. En til að læra af mistökunum þurfum við að horfast í augu við þau og viðurkenna þau,“
segir meðal annars í pistli þeirra.
Eftir umfjöllun Vísis á föstudag skrifuðu bæjarfulltrúar Sjálfstæðisflokksins, sem skipa meirihluta í Ölfusi grein til birtingar á Vísi. Tilefnið var að sögn: „Vegna óvæginna og meiðandi orða eins af bæjarfulltrúum okkar góða sveitarfélags“. Þar er vísað til orða Ásu Berglindar Hjálmarsdóttur bæjarfulltrúa H-lista í umfjöllun Vísis. Í greininni eru rakin ýmis atriði sem greinarhöfundar flokka sem rangfærslur. Þannig að ljóst má vera að í Þorlákshöfn eru skiptar skoðanir um skipulag og atvinnustarfsemi í bæjarfélaginu.
