Erlent

Ætla að grafa hægt og rólega undan Rússum

Samúel Karl Ólason skrifar
Úkraínskir hermenn skjóta á Rússa í Kherson með fallbyssu.
Úkraínskir hermenn skjóta á Rússa í Kherson með fallbyssu. Getty/Metin Aktas

Dregið hefur úr stórskotaliðsárásum Rússa í suðurhluta Úkraínu samhliða auknum árásum Úkraínumanna á skotfærageymslur, birgðastöðvar, brýr og aðra innviði á Krímskaga og í suðurhluta Kherson. Her Úkraínu virðist hafa breytt um stefnu og vinnur nú með langvarandi átök í huga.

Markmið Úkraínumanna er að valda óróa á bakvið línur Rússa og draga móðinn úr þeim á hernumdum svæðum Úkraínu.

Margar stórar sprengingar hafa orðið í Kherson og á Krímskaga á undanförnum dögum. Í nótt virðist skotfærageymsla í Belgorod í Rússlandi hafi sprungið í loft upp. Ráðamenn í Rússlandi hafa ekki viljað viðurkenna að um sé að ræða árásir frá Úkraínumönnum.

Það hefur breyst lítillega og hafa Rússar nokkrum sinnum viðurkennt árásir en lítið sagt um umfang þeirra.

Sjá einnig: Rússar segja stórar sprengingar á Krímskaga skemmdarverk

Svipað má segja um Úkraínumenn sem hafa lítið vilja segja um árásirnar, annað en að þeir hafi gert þær. New York Times (áskriftarvefur) hefur eftir Oleksiy Danilov, formanni þjóðaröryggisráðs Úkraínu, að árásirnar væru liður í áætlun Úkraínumanna um að granda hernaðarlega mikilvægum skotmörkum á Krímskaga, í aðdraganda frelsunar héraðsins.

Úkraínskir sjálfboðaliðar á víglínunni í Kherson.Getty/Matteo Placucci

Sprengingar yfir Kerch-sundi

Í nótt urðu sprengingar í herstöð skammt frá Sevastopol á Krímskaga og sömuleiðis heyrðust sprengingar yfir Kerch-sundi. Heimildarmenn NYT segja að kveikt hafi verið á loftvörnum Rússa á svæðinu. Þá hafa rússnesk herskip sést á sundinu í dag.

Eftir að Rússar réðust inn í Úkraínu og innlimuðu Krímskaga árið 2014, var reist brú yfir Kerch-sund og meginlands Rússlands. Sú brú er gífurlega mikilvæg birgðaneti Rússa í suðurhluta Úkraínu.

Úkraínumenn lýstu því yfir í sumar að til stæði að frelsa Kherson-hérað. Vólódímír Selenskí, forseti Úkraínu, skipaði hernum að frelsa héraðið og hafa bæði Úkraínumenn og Rússar sent mikinn liðsauka að víglínunum í suðri.

Í þó nokkrar vikur hafa litlar hreyfingar orðið á víglínunum, bæði í Kherson og á Donbas-svæðinu í austri, þar sem Rússar settu mestan þunga í innrás sína eftir að sóknin að Kænugarði misheppnaðist.

Í Donbas náðu Rússar töluverðum árangri en þeim hefur lítið orðið ágengt á undanförnum vikum.

Sjá einnig: Lýsa aðstæðum sem „helvíti á jörðu“

Talsmenn varnarmálaráðuneytis Bandaríkjanna sögðust á blaðamannafundi í dag sjá ummerki þess að árásir Úkraínumanna á bakvið víglínurnar séu að skila árangri. Stórskotalið Rússa hafi minna af skotfærum og sumar herdeildir séu jafnvel að verða uppiskroppa.

Þá hafi Rússar átt í miklum vandræðum með að sameina illa laskaðar herdeildir og endurskipuleggja herafla sinn eftir kostnaðarsamar árásir í Úkraínu.

Wall Street Journal (áskriftarvefur) hefur eftir úkraínskum hermönnum í Kherson að samanborið við fyrir þremur til fjórum vikum síðan hafi stórskotaliðsárásum Rússa fækkað um sirka helming. Árásir Rússa séu þó enn mun algengari en stórskotaliðsárásir Úkraínumanna.

Maraþon, ekki spretthlaup

Einn viðmælandi miðilsins sagðist ekki hafa skotið úr riffli sínum í rúman mánuð.

Í stað þess að sækja fram gegn vel búnum og vel víggirtum hersveitum Rússa, ætla Úkraínumenn þess í stað að nota eldflaugakerfi sem kallast HIMARS og aðrar leiðir til að einangra og grafa undan vörnum Rússa í Kherson og mögulega þvinga Rússa til að hörfa suður yfir Dnipro-ána.

Stórskotalið spilar stóra rullu í átökunum í Úkraínu og góðar skotgrafir eru mikilvægar.Getty/Wojciech Grzedzinski

HIMARS gera Úkraínumönnum kleift að gera nákvæmar árásir á skotmörk í allt að hundrað kílómetra fjarlægð. Úkraínumenn eiga á annan tug slíkra vopnakerfa og eru þau sögð hafa skipt sköpum.

Úkraínumenn eru búnir að skemma flestar brýr yfir ána og þurfa Rússar nú að koma birgðum til hermanna sinna hinu megin með því að nota ferjur og flotbrýr.

„Þeir eru fleiri en við. Þeir hafa fleiri vopn. Þeir eru öflugri í loftinu,“ sagði Natalia Humeniuk, talskona úkraínska hersins í suðri, við WSJ. „Við þurfum að finna leiðir til að sigra þá við þessar kringumstæður. Það er ekki auðvelt en það er geranlegt.“

Teygja á birgðaneti Rússa

Þótt Úkraínumenn virðist eiga langt í land með að frelsa Krímskaga hafa árásirnar þó haft áhrif á birgðakeðju Rússa í suðurhluta Úkraínu. Allar birgðir rússneskra hermanna í suðurhluta Úkraínu fara í gegnum Krímskaga.

Árásir á skotfærageymslur og birgðastöðvar á Krímskaga og Úkraínu granda auðvitað miklu magni af skotfærum og birgðum. Þær hafa þó einnig þau áhrif að Rússar neyðast til að færa þessar geymslur lengra frá víglínum og teygja þannig enn frekar á birgðaneti þeirra.

Árásir á lestarteina þvinga þar að auki Rússa til að nota bíla til að flytja birgðir um. Sérfræðingar segja Rússneska herinn hannaðann til að treysta á lestarflutninga og það að flytja birgir langar leiðir með bílum muni reynast Rússum erfitt.

Stjórnstöðvar rússneska hersins, sem hafa einnig verið vinsæl skotmörk Úkraínumanna, hafa einnig verið færðar fjær víglínunum í Úkraínu. Talskona úkraínska hersins í suðri sagði frá því á dögunum að Rússar hefðu flutt stjórnstöð þeirra í Kherson yfir Dnipro-á.

Ben Hodges, fyrrverandi herforingi og yfirmaður herafla Banaríkjanna í Evrópu, segir birgðanet Rússa ekki ráða við álagið. Það hafi ekki verið hannað til langvarandi átaka utan landamæri Rússlands. Viðskiptaþvinganir og refsiaðgerðir hafi sömuleiðis komið niður á því og leitt til skortsá varahlutum.

Í samtali við WSJ segir hann að líklegast sé það einungis tímaspursmál hvenær Rússar muni hörfa frá Kherson-borg og yfir Dnipro-á.

Sérfræðingar hugveitunnar Institute for the study of War áætla að í gær hafi hvorki Rússar né Úkraínumenn sótt fram. Það ku vera í fyrsta sinn frá 6. júlí sem hvorugur herinn leggur undir sig landsvæði.

Á meðfylgjandi kortum má sjá hvernig staðan er á vígvöllum Úkraínu.


Tengdar fréttir

Eistar meina flestum Rússum inngöngu í land sitt

Eistland tilkynnti það í morgun að frá byrjun næstu viku mun landið meina allmörgum Rússum inngöngu í landið. Rússar sem hafa fengið vegabréfsáritun frá eistneskum yfirvöldum munu ekki lengur fá að heimsækja Eistland.

Segja Rússland vera hryðjuverkaríki

Þingmenn Lettlands samþykktu í morgun ályktun um að Rússland væri hryðjuverkaríki og aðgerðir Rússa í Úkraínu væru tilraunir til þjóðarmorðs á úkraínsku þjóðinni. Þingmennirnir kölluðu eftir því að önnur ríki lýsi því einnig yfir að Rússland sé hryðjuverkaríki.

Sameinuðu þjóðirnar uggandi eftir ítrekaðar árásir á kjarnorkuver

Rússar og Úkraínumenn benda enn hvorir á aðra vegna ítrekaðra árása á stærsta kjarnorkuver Evrópu í austurhluta Úkraínu. Árásir þessar hafa aukið á áhyggjur manna af því árásirnar leiði til stórslyss í kjarnorkuverinu sem hafi óafturkræfar afleiðingar í för með sér. Aðalritari Sameinuðu þjóðanna kallar eftir því að svæðið í kringum kjarnorkuverið verði hlutlaust.

Frelsun Krímskaga forsenda stríðsloka, segir Selenskí

Stríðið í Úkraínu hófst með innlimun Krímskaga og mun aðeins enda með frelsun hans, segir Vólódímír Selenskí Úkraínuforseti. Selenskí segir Krímskaga tilheyra Úkraínu og að Úkraínumenn muni aldrei gefa hann eftir.

Stjaksettu höfuð úkraínsks hermanns

Myndefni af afskræmdu líki úkraínsks hermanns sem fangaður var af Rússum hefur verið í dreifingu um helgina og vakið mikla reiði. Hermaðurinn virðist hafa verið afhöfðaður og höfði hans og höndum komið fyrir á skafti í borginni Popasna í Úkraínu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.