Tímamótabreytingar fram undan hjá BBC

Óttar Kolbeinsson Proppé skrifar 16. janúar 2022 23:38

Margir velta fyrir sér hvort þetta sé upphafið að endalokum ríkisrekins fjölmiðils í Bretlandi. Getty/Vuk Valcic

Fjárframlagakerfi til breska ríkisútvarpsins tekur miklum breytingum á allra næstu árum að sögn Nadine Dorries, menningarmálaráðherra Bretlands, sem kynnti framtíðaráætlanir ríkisstjórnarinnar í dag. Afnotagjöld breska ríkisútvarpsins verða felld niður eftir fimm ár.

Gjöldin munu standa í stað næstu tvö árin en hækka nokkuð næstu næstu þrjú ár á eftir, til ársins 2027 þegar þau verða svo lögð niður endanlega. Þau eru 159 pund á ári í dag eða um 28 þúsund íslenskar krónur miðað við gengið í dag.

Dorries sagði í dag að þetta væri síðasta tilkynning ríkisstjórnarinnar um framtíð afnotagjaldanna. Margir hafa nú áhyggjur af framtíð BBC, fjárhagslegri framtíð miðilsins og ritstjórnarsjálfstæði undir íhaldsstjórn.

„Núna er komið að því að ræða og takast á um nýjar leiðir til fjármögnunar, stuðnings og sölu á frábæru bresku efni,“ sagði Dorries.

Samkvæmt frétt The Guardian er von á enn meiri niðurskurði í starfsemi BBC á næstunni og mun hún líklega vera gerð á sviði ljósvakans, í sjónvarps- og útvarpsgerð miðilsins.

Bretland Fjölmiðlar Bíó og sjónvarp

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.