Erlent

„Það eru ekki við sem höfum ógnað neinum“

Samúel Karl Ólason skrifar
Vladimír Pútín, forseti Rússlands, hélt fjögurra tíma blaðamannafund í dag.
Vladimír Pútín, forseti Rússlands, hélt fjögurra tíma blaðamannafund í dag. AP/Alexander Zemlianichenko

Vladimír Pútín, forseti Rússlands, krafðist þess aftur í dag að vesturveldin svokölluðu veittu Rússum tryggingar gagnvart því að Atlantshafsbandalagið neitaði ríkjum Austur-Evrópu um aðild að bandalaginu og vísaði aðildarríkjum af svæðinu á dyr.

Mikil spenna er á svæðinu eftir að Rússar fluttu tugi þúsunda hermanna að landamærum Úkraínu.

Þetta sagði Pútín á árlegum maraþonblaðamannafundi sínum í dag. Hann sagði að viðræður við Bandaríkin ættu að hefjast í næsta mánuði en ítrekaði að hann ætlaðist til skjótrar niðurstöðu úr þeim viðræðum.

Rússar kröfðust þess meðal annars um síðustu helgi að Úkraínu yrði meinaður aðgangur að NATO og að bandalagið myndi flytja alla sína hermenn og búnað úr þeim ríkjum sem gengu til liðs við það eftir 1997. Þar á meðal eru Pólland og Eystrasaltsríkin, sem hafa varað við því að Rússar vilji auka umsvif sín á svæðinu og draga úr fullveldi þeirra.

Sjá einnig: Rússar krefjast þess að NATO hverfi frá austur Evrópu

Pólland, Ungverjaland og Tékkland gengu til liðs við Atlantshafsbandalagið árið 1999. Árið 2004 gerðu Búlgaríu, Rúmenía og Slóvakía það einnig auk Eystrasaltsríkjanna Eistlands, Lettlands og Litháen. Í kjölfarið af því gengu Albanía, Króatía, Svartfjallaland og Norður Makedónía það einnig. Þessi ríki eru á gömlu yfirráðasvæði Sovétríkjanna.

Ætla ekki að útiloka Úkraínu

Forsvarsmenn NATO segja ekki koma til greina að neita ríkjum möguleika að aðild að bandalaginu, eins og Pútín hefur krafist. Sú ákvörðun sé á höndum íbúa ríkjanna sjálfra og svo aðildarríkja NATO sem þurfa að samþykkja umsóknir. Það er eitt að grunngildum NATO að hvaða ríki sem er geti sótt um aðild.

Rússneskir hermenn við æfingar.AP

Áður en Rússar réðust inn í Krímskaga og innlimuðu hann af Úkraínu og aðstoðuðu aðskilnaðarsinna í austurhluta landsins með peningum, vopnum og hermönnum, var til umræðu í Úkraínu að sækja um aðild að Evrópusambandinu og Atlantshafsbandalaginu.

Rússar eru sagðir hafa komið um hundrað þúsund hermönnum fyrir við landamæri Úkraínu og er óttast að þeir ætli sér að gera aðra innrás í landið.

Blaðamaður Sky News spurði Pútín á fundinum hvort hann myndi ábyrgjast að ekki yrði gerð innrás í Úkraínu. Þeirri spurningu svaraði hann á þann veg að aðgerðir ríkisstjórnar hans myndu fara eftir því hvaða tryggingar vesturveldin myndu veita Rússlandi.

„Það eru ekki við sem höfum ógnað neinum,“ hefur AP fréttaveitan eftir Pútín. „Eru það við sem erum við landamæri Bandaríkjanna eða Bretlands? Nei, þeir hafa komið til okkar og nú segja þeir að Úkraína muni verða í NATO.“

Hér að neðan má sjá blaðamannafund Pútíns í heild sinni.

Sakaði vestrið um heilaþvott

Pútin sakaði vestrið um að reyna að snúa Úkraínumönnum gegn Rússlandi með nútímavopnum og heilaþvætti. Þá sagði hann það mikilvægt fyrir öryggi Rússlands að tryggja að vestræn vopn væru ekki í Úkraínu.

Slík vopn gætu, samkvæmt Pútín, hvatt Úkraínumenn til að reyna að ná aftur yfirráðum á svæði aðskilnaðarsinnanna, sem Rússar styðja, og Krímskaga, sem Rússar innlimuðu í innrás árið 2014.

Þá sagði Pútín að hinar meintu áhyggjur af innrás Rússa í Úkraínu gæti verið til þess ætlaðar að undirbúa tilraun Úkraínumanna til að sigra aðskilnaðarsinnana.

TASS fréttaveitan, sem er í eigu rússneska ríkisins, hefur eftir forsetanum að vesturveldin beiti Rússland miklum þrýstingi vegna stærðar ríkisins og að lengi hefði verið komið illa fram við Rússland og þar áður Sovétríkin.

Pútín hélt því fram að Sovétríkin hefðu reynt sitt ítrasta til að byggja upp jákvæð samskipti við vesturveldin. Hann sagði einnig að eftir fall Sovétríkjanna hefði vestrið átt að koma fram við Rússland sem mögulegan bandamann í stað þess að reyna að sundra ríkinu frekar. Hann sagði munnleg loforð hafa verið veitt fyrir því að NATO myndi ekki teygja anga sína til austurs en þau loforð hefðu verið brotin.

FVladimír Pútín og George Robertson, þáverandi framkvæmdastjóri NATO, takast í hendur í Belgíu árið 2002AP/Viktor Korotayev

Íhugaði sjálfur að Rússar gengju í NATO

George Robertson, sem leiddi NATO á árunum 1999 til 2003, rifjaði upp í nóvember að Pútín sjálfur hefði sjálfur haft áhuga á því að Rússland gengi til liðs við Atlantshafsbandalagið. Skömmu eftir að hann hafi orðið forseti árið 2000 hefði Pútín spurt sig hvenær NATO ætlaði að bjóða Rússum aðild.

Robertson sagði að ríkjum væri ekki boðin aðild. Þó sóttu um, samkvæmt frétt Guardian.

Þá á Pútín að hafa svarað á þá leið að Rússland myndi ekki bíða í röð með öðrum ríkjum sem skiptu ekki máli.

Guardian vísar einnig í viðtal við Pútín frá þessum tíma þar sem hann sagði aðild að NATO koma til greina. Rússland væri hluti af evrópskri menningu og hann gæti ekki ímyndað sér Rússland sem væri einangrað frá „því sem við köllum hinn siðmentaða heim“.


Tengdar fréttir

Segir Rússa tilbúna í átök

Vladimír Pútín, forseti Rússlands, segir ríkisstjórn sína tilbúna til hernaðarátaka sýni vesturveldin óvinveittar aðgerðir vegna Úkraínudeilunnar. Pútín hefur lengi sakað Bandaríkin og Atlantshafsbandalagið um að valda aukinni spennu nærri landamærum Rússlands.

Þorgerður Katrín segir hættulegt að verða við kröfum Rússa

Formaður Viðreisnar sem jafnframt situr í utanríkismálanefnd segir að engin ein aðildarþjóð Atlantshafsbandalagsins geti ákveðið viðbrögð þess ef Rússar ráðast inn í Úkraínu. En breski varnarmálaráðherrann segir ósennilegt að NATO myndi senda hersveitir þangað Úkraínumönnum til varnar ef til innrásar kæmi.

Reiðir yfir því að fá ekki boð á lýðræðisfund Bidens

Joe Biden mun í dag loka tveggja daga stafrænum lýðræðisfundi sínum með því að beina athygli að mikilvægi þess að standa í hárinu á harðræðisstjórnum og einræðisherrum og það að tryggja sjálfstæða fjölmiðla.

Ætla að banna helstu mann­réttinda­sam­tök Rúss­lands

Rússneskir saksóknarar kröfðust þess í dag að hæstiréttur leysti upp ein helstu mannréttindasamtök landsins. Þau afhjúpuðu meðal annars voðaverk hersins í Téténíustríðunum og rannsaka kúgun andófsfólks í Sovétríkjunum.




Fleiri fréttir

Sjá meira


×