Lögreglumaðurinn áfrýjar dómi vegna dauða Georges Floyd

Kjartan Kjartansson skrifar 24. september 2021 10:16

Derek Chauvin var dæmdur í 22 og hálfs árs fangelsi fyrir að verða George Floyd að bana í maí í fyrra. EPA/Lögreglustjórinn í Hennepin-sýslu

Derek Chauvin, lögreglumaðurinn sem var dæmdur í meira en 22 ára fangelsi fyrir að valda dauða George Floyd í Minneapolis í Bandaríkjunum í fyrra hefur áfrýjað dómnum. Chauvin kraup ofan á hálsi Floyd þar til hann lét lífið.

Kviðdómur sakfelldi Chauvin, sem er hvítur, fyrir manndráp á Floyd, sem var svartur. Drápið vakti mikla reiði í Bandaríkjunum og víða um heim. Það varð kveikjan að bylgju mótmæla gegn kerfislægri kynþáttahyggju og lögregluofbeldi sem náði langt út frá Bandaríkin.

Í greinargerð sem Chauvin lagði fram til stuðnings áfrýjuninni gagnrýndi hann fjórtán atriði við saksóknina gegn sér, þar á meðal að kröfu hans um að flytja réttarhöldin hafi verið hafnað. Þá gagnrýnir hann að réttarhöldin hafi ekki verið ógilt vegna þess sem hann segir misferli kviðdómenda, að sögn Reuters-fréttastofunnar.

Einnig krefst Chauvin þess að áfrýjuferlið verði sett á ís tímabundið á meðan Hæstiréttur Minnesota tekur afstöðu til þess hvort að rétt hafi verið að neita honum um skipaðan verjanda í áfrýjuninni. Segist Chauvin án lögmanns og að hann hafi engar tekjur til að greiða fyrir lögfræðiþjónustu. Samband lögreglumanna í Minnesota hafi greitt fyrir málsvörn sína en það hafi hætt að greiða fyrir lögfræðiþjónustu eftir að hann var sakfelldur og gerð refsing.

Dauði George Floyd Bandaríkin Erlend sakamál

Tengdar fréttir

Morðingi Floyd í meira en 22 ára fangelsi

Derek Chauvin, fyrrverandi lögreglumaður í Minneapolis, var dæmdur í 22 og háfs árs fangelsi fyrir að verða George Floyd að bana með því að krjúpa á hálsi hans í fyrra. Drápið á Floyd varð kveikjan að miklum mótmælum í Bandaríkjunum og víða um heim.

25. júní 2021 20:06

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir