Mannfall í mótmælum gegn talibönum

Vitni segja Reuters-fréttastofunni að mótmælendur hafi verið drepnir þegar hópur fólks reyndi að draga þjóðfána Afganistans að húni á torgi í Jalalabad. AP-fréttastofan segir aftur á móti að einn sé látinn og sex særðir og hefur það eftir ónefndum heilbrigðisstarfsmanni á svæðinu.

Ttugir manna hafi safnast saman á torginu en á morgun er þjóðhátíðardagur Afganistans. Fólkið tók niður fána talibana sem hefur blakað þar frá því að þeir lögðu borgina undir sig. Myndbönd sýni liðsmenn talibana berja fólk með kylfum og skjóta upp í loftið til að dreifa mannfjöldanum.

Leiðtogar talibana hafa fram að þessu lagt sig í lima við að lofa friði og að þeir ætli að tryggja öryggi í Afganistan. Þeir muni ekki reyna að koma fram hefndum gegn óvinum sínum nú þegar þeir hafa tekið nær öll völd í landinu eftir að Ashraf Ghani forseti flúði land um helgina.

Margir Afganar taka þeim loforðum þó með miklum fyrirvara. Í fyrri stjórnartíð sinni frá 1996 til 2001 framfylgdu þeir strangri túlkun á íslömskum lögum. Konum var bannað að vinna og að fara út úr húsi án karlkyns forráðamanns, stúlkur fengu ekki að mennta sig og meintum glæpamönnum var refsað með grimmilegum líkamlegum refsingum svo eitthvað sé nefnt.

Í Kabúl hafa borist fregnir af því að vopnaðir menn gangi í hús og spyrji um Afgana sem unnu fyrir Bandaríkjaher eða fallna ríkisstjórn landsins. AP segir ekki ljóst hvort að mennirnir séu talibanar eða glæpamenn sem látast vera á vegum þeirra.

Áfram örtröð við flugvöllinn í Kabúl

Þúsundir Afgana hafa því reynt að flýja land í örvæntingu undanfarna daga. Vestræn ríki hafa nú flutt um 5.000 erindreka, liðsmenn öryggissveita, hjálparstarfsmenn og Afgani frá Kabúl síðasta sólarhringinn samkvæmt heimildum Reuters.

Troðningur við flugvöllinn í Kabúl hélt áfram í dag og er talið að sautján manns hafi slasast í honum. Óbreyttum borgurum sem eru ekki með vegabréf eða ferðaheimild hefur verið sagt að halda sig frá flugvellinum. Liðsmenn talibana, sem nú stjórna höfuðborginni, eru sagðir kanna vegabréf fólks sem bíður eftir því að komast úr landi.