Íslenski boltinn

Hvað er þetta með Heimi Guðjóns og heimaleiki liða hans á móti KR?

Óskar Ófeigur Jónsson skrifar
Heimir Guðjónsson hefur beðið eftir því í meira en 118 mánuði að fagna heimasigri á móti KR.
Heimir Guðjónsson hefur beðið eftir því í meira en 118 mánuði að fagna heimasigri á móti KR. Vísir/Hulda Margrét

Það hefur ekki verið mikið hægt að treysta á lið Heimis Guðjónssonar þegar uppeldisfélagið hans úr Vesturbænum kemur í heimsókn.

Heimir Guðjónsson fær tækifæri til að bæta slæmt gengi sitt á móti KR í stórleik kvöldsins í Pepsi Max deild karla þegar erkifjendurnir og nágrannarnir mætast á Origo vellinum á Hlíðarenda.

Heimir Guðjónsson er uppalinn KR-ingur og spilaði 124 leiki fyrir félagið í efstu deild. Hann hefur ekki stýrt Vesturbæjarfélaginu en margoft mætt því eftir hann gerðist þjálfari.

Það eru nefnilega rétt tæp tíu ár síðan að lið undir stjórn Heimis vann heimaleik á móti KR í efstu deild.

Sá sigur kom í hús 11. september 2011. Atlarnir sá um mörk FH í 2-1 sigri. Atli Guðnason kom FH í 1-0 á 22. mínútu og Atli Viðar Björnsson bætti við öðru marki á 42. mínútu. Kjartan Henry Finnbogason minnkaði munninn á 73. mínútu en FH fékk öll stigin.

Það var þriðji heimasigur liða Heimis á KR síðan hann tók við sem þjálfari FH en nú eru liðnir 3615 dagar síðan hann vann síðast heimaleik á móti sínu æskufélagi.

Á þessum áratug sem er liðin hafa lið Heimis spilað sjö heimaleiki á móti og uppskeran er aðeins eitt stig af 21 mögulegu eða fimm prósent stiga í boði.

Heimir hefur þannig horft upp á sína menn tapa sex af sjö heimaleikjum sínum á móti KR frá og með 2012 tímabilinu. Markatalan er níu mörk í mínus í þessum sjö viðureignum eða fimm mörk á móti fjórtán.

Leikur Vals og KR hefst klukkan 19.15 og verður sýndur beint á Stöð 2 Sport. Pepsi Max Upphitun hefst á Stöð 2 Sport klukkan 18.00 og eftir leikinn verður Pepsi Max Stúkan á sömu stöð.

Heimaleikir liða Heimis Guðjónssonar á móti KR:

  • Sem þjálfari Vals
  • 2020: 1-0 tap
  • -
  • Sem þjálfari FH:
  • 2017: 1-0 tap
  • 2016: 1-0 tap
  • 2015: 3-1 tap
  • 2014: 1-1 jafntefli
  • 2013: 4-2 tap

    2012: 3-1 tap
  • 2011: 2-1 sigur
  • 2010: 3-2 sigur
  • 2009: 4-2 tap
  • 2008: 2-0 sigur



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.