„Við erum að taka mjög með­vitaða á­kvörðun ein­mitt núna um að vernda ekki þá sem þurfa á því að halda,“ sagði Tedros Adhanom Ghebreyesus, yfir­maður WHO. Með annarri persónunni á hann við heiminn allan en ekki stofnunina sjálfa.

Stofnunin vill meina að ekki liggi fyrir næg gögn sem styðja við full­yrðingar Pfizers um að fólk verði að fá þriðja skammt bólu­efnisins, ári eftir að það fær aðra sprautuna. Lyfjarisinn ætti að ein­beita sér að því að tryggja að­gengi fá­tækari þjóða að bólu­efni.

Stofnunin ætlar sér að mæla með endur­bólu­setningum í fram­tíðinni ef rann­sóknir sýna fram á gagn þeirra en „ekki vegna full­yrðinga ein­staka fyrir­tækja um að þær þurfi“.

Þrátt fyrir nokkuð góða stöðu í Evrópu og Banda­ríkjunum er Delta-af­brigði veirunnar að dreifast hratt í löndum þar sem fáir eru bólu­settir. Og jafn­vel Banda­ríkjunum, sem hófu einna fyrst að bólu­setja gegn veirunni, virðist vera að fara aftur.

Nýjum til­fellum þar fjölgaði um 47 prósent í vikunni, sem er mesta aukning á einni viku í landinu síðan í apríl í fyrra. Þar eru ekki nema um 50 prósent þjóðarinnar full­bólu­sett.