Íslenski boltinn

„Ofboðslega gaman að sjá tvo menn með stórt hjarta takast á“

Óskar Ófeigur Jónsson skrifar
Kjartan Henry Finnbogason var ekki alveg nógu góður í öxlinni eftir leikinn á móti Leikni í gærkvöldi.
Kjartan Henry Finnbogason var ekki alveg nógu góður í öxlinni eftir leikinn á móti Leikni í gærkvöldi. S2 Sport

Kjartan Henry Finnbogason var á skotskónum með KR-ingum í sigri á Leikni í Pepsi Max deild karla í gærkvöldi en einvígi hans og Leiknismannsins Brynjars Hlöðverssonar var líka til umræðu í Pepsi Max stúkunni eftir leik.

Jón Þór Hauksson var gestur Kjartans Atla Kjartanssonar í Pepsi Max stúkunni og þeir skoðuðu atvikið þegar Kjartan Henry meiddist á öxl. Í fyrstu leit út fyrir að framherji KR-liðsins hefði farið út axlarlið.

„Kjartan Henry datt seint í leiknum og einhverjir óttuðust mögulega að hann væri farinn úr axlarlið eða eitthvað svoleiðis,“ sagði Kjartan Atli og sýndi atvikið þar sem Kjartan fékk eftir baráttu við Brynjar Hlöðversson.

„Maður veltir því fyrir sér hvort hann hafi hrokkið úr og í lið. Verið einhver hreyfing á liðnum. Ég tala nú af mikilli reynslu í þessum efnum og hef oft farið úr axlarlið sjálfur,“ sagði Jón Þór.

Klippa: Pepsi Max Stúkan: Barátta Kjartans og Brynjars

Kjartan Henry Finnbogason var spurður út í baráttuna við Brynjar Hlöðversson eftir leik. „Þessi barátta hjá þér og Binna Hlö. Það var gaman að fylgjast með þessu, mikil ástríða í gangi. Þetta hlýtur að vera barátta sem maður vill taka þátt í hverjum leik,“ spurði Smári Jökull Jónsson.

„Ég vil það og svona á fótbolti að vera. Hann er ótrúlega klókur og það er nánast með ólíkindum að hann slapp við að fá spjald í þessum leik. Það skiptir engu máli því við unnum. Við tókumst í hendur eftir leikinn og það var mjög gaman að spila á móti honum sem og öllu Leiknisliðinu,“ sagði Kjartan Henry.

„Það er ofboðslega gaman að sjá tvo menn með stórt hjarta takast á,“ sagði Kjartan Atli og Jón Þór tók undir það. „Þarna eru menn sem eru algjörlega tilbúnir að fara alla leið fyrir félagið sitt og það skein í gegn í þessari baráttu,“ sagði Jón Þór.

Það má sjá viðtalið við Kjartan Henry og alla umræðuna hér fyrir ofan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.