Alan Smith á slóðir Guðjóns

Alan Smith er genginn til liðs við Notts County þar sem hann mun bæði spila og gegna þjálfarstöðu hjá félaginu.

Smith er 33 ára gamall og lék árum áður með Leeds, Manchester United og Newcastle. Síðustu tvö árin hefur hann verið hjá MK Dons.

„Ég hef dáðst að Alan sem leikmanni í nokkurn tíma,“ sagði Shaun Derry, stjóri Notts County. „Hann var langbesti maður vallarins þegar ég sá hann spila með MK Dons í mars.“

„Ég veit að hann hefur enn ýmislegt fram að færa. Það er frábært að fá hann til liðs við okkur sem spilandi þjálfara.“

Smith spilaði síðast í ensku úrvalsdeildinni með Newcastle árið 2012 og fór til MK Dons eftir að samningur hans við Newcastle var ekki endurnýjaður.

MK Dons endaði í 20. sæti ensku C-deildarinnar og slapp því naumlega við fall. Guðjón Þórðarson, fyrrum landsliðsþjálfari, var stjóri Notts County frá 2005 til 2006.